Ўзбекистон Республикаси Президентининг 2025 йил 21 августдаги «Одил судлов соҳасида юқори малакали кадрлар тайёрлаш тизимини тубдан такомиллаштириш чора-тадбирлари тўғрисида»ги ПФ–141-сон Фармонига мувофиқ ташкил қилинган Ўзбекистон Республикаси Одил судлов академияси таркибида Иқтисодий-ҳуқуқий фанлар кафедраси фаолият юритади.

Кафедра судьялик лавозимларига номзодлар, судьялар ҳамда суд аппарати ходимлари учун «Иқтисодий ҳуқуқ ихтисослиги бўйича ўқув курси» доирасида ўқув модулларини ўқитишга ихтисослашган.

Ўқув машғулотлари замонавий ахборот-коммуникация технологияларидан фойдаланган ҳолда, интерактив усулларда ташкил этилади.

Таълим жараёни устоз–шогирд анъаналари асосида, «бўлажак судьяни судья ўқитади» тамойилига мувофиқ ташкил этилади. Кафедра профессор-ўқитувчилари таркиби кўп йиллик судьялик амалиётига эга, юксак малакали ҳуқуқшунослардан шакллантирилган.

Кафедра профессор-ўқитувчилари томонидан тингловчилар, судьялар ва суд аппарати ходимлари учун суд амалиётида қўллашга мўлжалланган махсус ўқув адабиётлари ва амалий қўлланмалар тайёрланиб, нашр қилинган.

Жумладан, «Иқтисодий ишлар бўйича суд ҳужжатлари намуналари», «Иқтисодий-ҳуқуқий фанлар бўйича тестлар тўплами», «Иқтисодий судларга мурожаат қилиш тартиби», «Тадбиркорлар ҳуқуқи суд ҳимоясида», «Шартномалар, даъво аризалари, медиация ва ҳакамлик судлари» ҳамда ҳакамлик муҳокамаси билан боғлиқ ишларни юритишга бағишланган ўқув-амалий қўлланмалар тайёрланган.