Bugun O‘zbekiston Respublikasi Odil sudlov akademiyasida uch kunga mo‘ljallangan “Raqamli odil sudlov: xalqaro standartlar, axborot xavfsizligi va inson huquqlari” mavzusidagi xalqaro o‘quv kursi boshlandi. Prezidentimizning 2025-yil 21-avgustdagi “Odil sudlov sohasida yuqori malakali kadrlar tayyorlash tizimini tubdan takomillashtirish chora-tadbirlari to‘g‘risida”gi Farmoniga muvofiq, sud tizimi uchun yuqori malakali huquqshunos kadrlar tayyorlash tizimini xalqaro standartlar asosida yanada takomillashtirish, shuningdek, milliy va xorijiy kadrlarni tayyorlash, qayta tayyorlash hamda ularning malakasini oshirish ustuvor vazifalardan biri etib belgilangan. Bugun boshlangan “Raqamli odil sudlov: xalqaro standartlar, axborot xavfsizligi va inson huquqlari” mavzusidagi mazkur o‘quv kursi Akademiya uchun alohida ahamiyatga ega. Xususan, Akademiya tarixida ilk bor xorijiy davlatlar sud-huquq tizimi vakillarini o‘qitishga qaratilgan bunday formatdagi xalqaro o‘quv dasturi yo‘lga qo‘yilmoqda. Mazkur tadbirda Ispaniya, Ozarbayjon, Qirg‘iziston, Qozog‘iston va Turkiyaning tegishli sudyalar tayyorlash muassasalaridan 12 nafar ishtirokchi, shuningdek, O‘zbekistondan 14 nafar sudya ishtirok etmoqda. Mazkur o‘quv kursi sud tizimida raqamli transformatsiya jarayonlarini jadallashtirish, axborot xavfsizligini ta’minlash hamda inson huquqlarini samarali himoya qilishga qaratilgan dolzarb bilim va ko‘nikmalarni shakllantirishga xizmat qiladi.

Bugun Odil sudlov akademiyasida xalqaro hamkorlikni mustahkamlash doirasida Ispaniyaning nufuzli Salamanka universiteti vakillari — professor Lorenso M. Buxosa Vadel hamda doktor Valter Reyfart Munyos bilan uchrashuv o‘tkazildi. Uchrashuvda xalqaro ekspertlar hamda Odil sudlov akademiyasi rahbariyati ishtirok etdi. Muloqot davomida tomonlar zamonaviy protsessual huquq, inson huquqlarining sud orqali himoya qilinishi hamda sud tizimida raqamlashtirish masalalarini muhokama qildilar. Mehmonlar Salamanka universitetining huquqshunos kadrlarni tayyorlash bo‘yicha tajribasi, xususan, jamoaviy manfaatlarni sud orqali himoya qilish va konstitutsiyaviy kafolatlar borasidagi ilmiy izlanishlar bilan o‘rtoqlashdilar. ⏺Uchrashuv davomida Odil sudlov akademiyasi tomonidan istiqboldagi hamkorlik bo‘yicha quyidagi tashabbuslar ilgari surildi: 💬Xalqaro tajriba asosida master-klasslar: Professor Lorenso M. Buxosa Vadel va doktor Valter Munyos ishtirokida "Inson huquqlari bo‘yicha Yevropa sudi qarorlarining milliy huquq tizimiga ta’siri" va "Elektron mediatsiya" mavzularida seminar-treninglar tashkil etish; 💬Ilmiy hamkorlik ва nashrlar: Salamanka universiteti va Odil sudlov akademiyasi olimlari hamkorligida protsessual huquqning dolzarb muammolariga bag‘ishlangan qo‘shma o‘quv qo‘llanmalar va ilmiy maqolalar tayyorlash; 💬Akademik almashinuv: Akademiyaning yosh tadqiqotchilari ва professor-o‘qituvchilari uchun Salamanka universitetida qisqa muddatli ilmiy stajirovkalarni yo‘lga qo‘yish; 💬Zamonaviy o‘quv metodikasi: Ispaniya tajribasi asosida "Kollektiv huquqlarni himoya qilish" va "Xalqaro jinoiy sud bilan protsessual hamkorlik" mavzularini o‘quv dasturlariga tatbiq etish. Uchrashuv yakunida tomonlar o‘zaro ilmiy ва o‘quv aloqalarini yangi bosqichga ko‘tarish, shuningdek, ilgari surilgan takliflarni amaliyotga joriy etish maqsadida hamkorlik memorandumini tayyorlash masalasida kelishib oldilar.

Avval xabar berganimizdek, Turkiya Respublikasida inson huquqlari bo‘yicha xalqaro o‘quv dasturi doirasida tadbir o‘tkazildi. Mazkur o‘quv dasturida O‘zbekiston Respublikasi Sudyalar oliy kengashi sudyasi A.Xamrayev, Akademiya prorektori N.Salayev, kafedra mudiri D.Israilov hamda professor-o‘qituvchi S.Mamadiyev ishtirok etdi. Dastur davomida inson huquqlari sohasiga oid dolzarb mavzular yuzasidan fikr almashildi, Turkiy davlatlar sud-huquq kadrlarini tayyorlash tarmog‘iga a’zo mamlakatlar vakillari bilan o‘zaro tajriba almashildi, zamonaviy yondashuvlar hamda ilg‘or amaliyotlar muhokama qilindi. O‘quv dasturi yakunida delegatsiya a'zolariga mazkur xalqaro o‘quv dasturida muvaffaqiyatli ishtirok etganliklari uchun sertifikatlar topshirildi. Xalqaro o‘quv dasturida ishtirok etish Akademiya vakillarining kasbiy salohiyatini yanada oshirish, xalqaro tajribani o‘rganish hamda sud-huquq tizimida zamonaviy yondashuvlarni keng joriy etishga xizmat qiladi.

O‘zbekiston Respublikasi Prezidenti tashabbusi bilan tashkil etilgan Rahbar kadrlarni baholash markazida O‘zbekiston Respublikasi Prezidenti Administratsiyasi, Oliy sud, Sudyalar oliy kengashi va Odil sudlov akademiyasi mas’ullari ishtirokida taqdimot tadbiri o‘tkazildi. Unda sud hamjamiyati vakillari davlat xizmatida professional kadrlar korpusini shakllantirish, ularni baholash va rivojlantirish bo‘yicha joriy etilgan zamonaviy tizim bilan tanishtirildi. Ma’lumot uchun, davlat xizmatchilarini baholash jarayoniga raqamlashtirish va sun’iy intellekt texnologiyalarini keng joriy etish natijasida ilgari rahbarlikka bir nafar nomzodni o‘rtacha 7 soat davom etgan assessment baholash jarayoni hozirgi kunda 80 daqiqani tashkil etmoqda. Uchrashuvda: ▫️sudyalar korpusi vakillariga nomzodlar tanlashda raqamli texnologiyalar, xususan sun’iy intеllektni qo’llash; ▫️tuman sudi sudyalari va xodimlari uchun davlat boshqaruvi, raqamlashtirish va sun’iy intellekt yo’nalishlarida mahalliy va xorijiy stajirovkalarni tashkil etish; ▫️"El-yurt umidi", JICA, KOICA va boshqa xalqaro stipendiya dasturlari orqali xorijda o’qigan istiqbolli kadrlarni sud organlariga jalb etish; ▫️Prezident maktablarini bitirib oliy ta’lim muassasalarida o’qiyotgan va tamomlaganlarni “ustoz-mentoring” tamoyili asosida sud organlari faoliyatida amaliyotlarni tashkil etish hamda ishga yo’naltirish; ▫️davlat boshqaruvi tizimi va sud hokimiyati organlari o’rtasida yangi avlod kadrlarini shakllantirish va istiqbolli rahbarlarni aniqlashga qaratilgan TOP-100 tanlov dasturini amalga oshirish bo‘yicha hamkorlik yo’nalishlari belgilab olindi.

Avval xabar qilganimizdek bugun O‘zbekiston Respublikasi Odil sudlov akademiyasida “Sud jurnalistikasi” yo‘nalishidagi maxsus o‘quv kursining ochilish marosimi bo‘lib o‘tdi.  Mazkur o‘quv kursi Odil sudlov akademiyasi hamda Jurnalistika va ommaviy kommunikatsiyalar universiteti hamkorligida tashkil etilib, uning asosiy maqsadi bo‘lajak jurnalistlarda sud-huquq tizimi faoliyatini chuqur anglash, sud jarayonlarini xolis va professional yoritish ko‘nikmalarini shakllantirishdan iborat bo‘ldi.  Tadbirda Sudyalar oliy kengashi raisi X.B. Yodgorov, Jurnalistika va ommaviy kommunikatsiyalar universiteti Yoshlar masalalari va ma’naviy-ma’rifiy ishlar bo‘yicha birinchi prorektori S.B. Rashidov, Odil sudlov akademiyasi rektori Sh.Yo. Abduqodirov, shuningdek O‘zbekiston Jurnalistlar uyushmasi raisi v.b. Sh.O. Oripovlar ishtirok etib, so‘zga chiqdilar. Ular o‘z ma’ruzalarida mamlakatimizda sud-huquq sohasida amalga oshirilayotgan islohotlar, sud tizimining ochiqligi va shaffofligini ta’minlash, jamoatchilik bilan samarali muloqotni kuchaytirishda ommaviy axborot vositalarining o‘rni beqiyos ekanligini ta’kidladilar. Mazkur o‘quv kursida jami 41 nafar Jurnalistika va ommaviy kommunikatsiyalar universiteti talabalari ishtirok etdi. Ular ushbu kurs orqali sud-huquq tizimi faoliyatini chuqur o‘rganish hamda sud jarayonlarini professional darajada yoritish bo‘yicha amaliy ko‘nikmalarga ega bo‘lish imkoniyatini qo‘lga kiritdilar.

Oʻzbekiston Respublikasi Odil sudlov akademiyasining Kasbiy qayta tayyorlash kursi bitiruvchilariga tantanali sertifikat topshirish marosimi boʻlib oʻtdi. Tadbir Toshkent davlat yuridik universiteti majlislar zalida tashkil etilib, unda Oʻzbekiston Respublikasi Prezident Administratsiyasi, Sudyalar oliy kengashi, Konstitutsiyaviy sud, Oliy sud, Sudyalar assotsiatsiyasi, Ayol sudyalar assotsiatsiyasi, Oʻzbekiston “Adolat” sotsial-demokratik partiyasi vakillari, bitiruvchilar, ularning ota-onalari hamda ommaviy axborot vositalari xodimlari ishtirok etdi. Marosim davlat madhiyasi bilan ochildi. Tadbirda soʻzga chiqqan faxriy mehmonlar tomonidan soʻnggi yillarda Prezidentimiz boshchiligida amalga oshirilayotgan sud-huquq islohotlari natijasida yuqori malakali kadrlar tayyorlash borasida muhim ijobiy oʻzgarishlar yuz berayotgani alohida taʼkidlandi. Xususan, Oʻzbekiston Respublikasi Prezidentining 2025-yil 21-avgustdagi PF–141-sonli Farmoniga muvofiq, Sudyalar oliy kengashi huzuridagi Sudyalar oliy maktabi negizida Oʻzbekiston Respublikasi Odil sudlov akademiyasi tashkil etilib, sud-huquq tizimi uchun kadrlar tayyorlash tizimi mutlaqo yangi bosqichga olib chiqilgani qayd etildi. 2025/2026 oʻquv yili uchun tashkil etilgan Kasbiy qayta tayyorlash kursiga 1016 nafar talabgor orasidan 164 nafar tinglovchi qabul qilinib, ularning 159 nafari dasturni muvaffaqiyatli yakunladi. Bitiruvchilarning aksariyati sud, advokatura, ekspertiza hamda huquqni muhofaza qiluvchi organlarda faoliyat yuritayotgan amaliyotchilardan iborat boʻldi. Statistik maʼlumotlarga koʻra, bitiruvchilarning 77 foizini erkaklar, 23 foizini esa ayollar tashkil etdi. Oʻquv jarayoni “nazariya – amaliyot – imitatsiya” tamoyili asosida olib borilib, 124 soat nazariy, 250 soat amaliy mashgʻulot hamda 250 soat sud imitatsiyalari oʻtkazildi. Tinglovchilar haftasiga 3 kun sudlarda amaliyot oʻtab, 4000 dan ortiq elektron sud ishlari asosida qaror qabul qilish koʻnikmalarini shakllantirdi. Taʼlim jarayonida 22 nafar professor-oʻqituvchi, jumladan, sobiq sudyalar va xorijiy mutaxassislar ishtirok etdi. Tinglovchilar deputatlar, advokatlar, prokurorlar hamda xalqaro ekspertlar bilan treninglarda qatnashib, Ispaniya, Germaniya, Litva, Turkiya, Yaponiya va Ozarbayjon davlatlari tajribasi bilan tanishtirildi. Kurs yakunida tinglovchilarning nazariy va amaliy bilimlarini baholash maqsadida yakuniy sinovlar oʻtkazildi. Mazkur kurs sud tizimi uchun yetuk kadrlar tayyorlash bilan birga, jamiyatda adolat va qonun ustuvorligini taʼminlash yoʻlidagi muhim qadam sifatida baholandi. Marosim davomida yangi avlod sudyalarini tayyorlashga bagʻishlangan videorolik namoyish etildi. Shundan soʻng bitiruvchilarga sertifikatlar tantanali ravishda topshirildi. Bitiruvchilarning ota-onalari va yaqinlari ham tabrik soʻzlari bilan ishtirok etishdi. Bitiruvchilar tomonidan Akademiya rahbariyati va professor-oʻqituvchilarga tilaklar yozilgan esdalik kitobi topshirildi. Marosim yakunida umumiy fotosuratga tushish hamda badiiy dastur namoyishi boʻlib oʻtdi. Mazkur marosim bitiruvchilarning kasbiy muvaffaqiyatini nishonlash bilan birga, ularning sudyalik faoliyatiga puxta tayyorgarlik koʻrganini yana bir bor namoyon etdi.

Bugun Samarqand shahrida O‘zbekiston Respublikasi Odil sudlov akademiyasi, Huquqni muhofaza qilish akademiyasi hamda Yevropada xavfsizlik va hamkorlik tashkilotining (YXHT) O‘zbekistondagi vakolatxonasi hamkorligida “Kiberjinoyatchilikka qarshi kurashish: kelajakka nazar” mavzusida seminar-trening tashkil etildi. Tadbirda kiberjinoyatchilikning dolzarb masalalari, raqamli dalillarni to‘plash, tahlil qilish va sud amaliyotida baholashning huquqiy asoslari atroflicha muhokama qilindi. Ishtirokchilar xalqaro tajribalar, inson huquqlari standartlari hamda zamonaviy tergov texnologiyalaridan samarali foydalanish uslublari bilan tanishishmoqda. Mazkur seminar-trening kiberjinoyatlarga qarshi kurashish bo‘yicha mutaxassislarning bilim va ko‘nikmalarini mustahkamlash, sud-huquq tizimi xodimlarining malakasini oshirishga xizmat qilmoqda.

Bugun Sudyalar oliy kengashi tashabbusi bilan Odil sudlov akademiyasida O‘zbekistonda xizmat ko‘rsatgan yurist Dilbar To‘xtamishevnaga bag‘ishlangan “Adolatning bir dilbari” nomli kitob taqdimoti bo‘lib o‘tdi. Tadbirda sud-huquq tizimining bir qator faxriylari va amaldagi vakillari, tinglovchilar hamda OAV vakillari ishtirok etdi. Mazkur kitobda Dilbar Murodovaning hayot yo‘li, sud-huquq tizimidagi ko‘p yillik samarali faoliyati hamda mas’uliyatli lavozimlardagi xizmatlari batafsil yoritilgan. Shuningdek, unda qahramonning insoniy fazilatlari — kamtarlik, matonat, halollik va jamiyat manfaatlariga sadoqat kabi jihatlar alohida ochib berilgan. Unda uning faoliyati shunchaki xizmat pillapoyalari emas, balki adolat yo‘lida olib borilgan fidokorona mehnat va izchil kurash sifatida tasvirlangan. Mazkur nashr nafaqat sudyalar, balki keng kitobxonlar uchun ham mo‘ljallangan bo‘lib, unda adolat, halollik va mas’uliyat kabi qadriyatlarning inson hayotidagi o‘rni hayotiy misollar orqali yoritilgan. Mazkur tadbir va kitob yosh soha vakillari hamda tinglovchilar uchun ilhomlantiruvchi manba bo‘lib xizmat qilishi shubhasiz.

Bugun Turkiy davlatlar sud-huquq kadrlarini tayyorlash tarmog‘iga (TJTN) a’zo davlatlar ishtirokida onlayn yig‘ilish bo‘lib o‘tdi. Yig‘ilishda 2026-yilda TJTNga raislik qilish navbati O‘zbekiston Respublikasiga topshirildi. Ushbu taklif barcha a’zo davlatlar tomonidan bir ovozdan ma’qullandi. 🗣 Raislik O‘zbekiston Respublikasi Odil sudlov akademiyasi hamda Huquqni muhofaza qilish akademiyasi tomonidan amalga oshiriladi. 🇺🇿 Odil sudlov akademiyasi ushbu vazifani qabul qilib, tarmoq doirasidagi tadbirlarni tashkil etish mas’uliyatini zimmasiga oldi. 📅 Navbatdagi yig‘ilish joriy yilning may oyida Toshkent shahrida o‘tkazilishi rejalashtirilgan. 💡 Ma’lumot uchun:TJTN 2022-yil 12-dekabr kuni Istanbul shahrida tashkil etilgan bo‘lib, Turk davlatlari tashkiloti (OTS)ga a’zo va kuzatuvchi davlatlarning sud-huquqiy ta’lim muassasalarini birlashtiradi. Tarmoq doirasida kadrlar tayyorlash, tajriba almashish va hamkorlikni rivojlantirishga qaratilgan tadbirlar muntazam o‘tkaziladi.