Akademik halollik va etik yuksalish kengashi tomonidan “Akademik halollik — umumiy mas’uliyat” mavzusida seminar-trening o‘tkazildi. Seminar-trening akademik halollik tamoyillariga qat’iy rioya etish, ta’lim va ilmiy faoliyatda mas’uliyatni yanada kuchaytirish masalalariga bag‘ishlandi.Akademiya professor-o‘qituvchilari va doktorantlari ishtirok etgan tadbirda Kengash faoliyati, o‘quv va ilmiy adabiyotlarni taqdim etish tartibi hamda Akademik halollik siyosatining mazmun-mohiyati haqida batafsil ma’lumot berildi.

O‘zbekiston Respublikasi Prezidentining 2025-yil 21-avgustdagi “Odil sudlov sohasida yuqori malakali kadrlar tayyorlash tizimini tubdan takomillashtirish chora-tadbirlari to‘g‘risida”gi PF–141-son Farmonining 8-bandiga muvofiq, amaldagi sudyalar uchun Oliy sud tomonidan belgilanadigan murakkab toifadagi ishlar yuzasidan malaka oshirish kurslarini tashkil etish belgilangan. Mazkur Farmon ijrosini ta’minlash maqsadida O‘zbekiston Respublikasi Odil sudlov akademiyasida amaldagi sudyalar uchun onlayn qisqa muddatli malaka oshirish kurslari boshlandi.Jumladan, fuqarolik ishlari bo‘yicha sudlar sudyalari uchun “Er-xotin o‘rtasidagi umumiy mulkni bo‘lishga oid nizolarni sudda ko‘rish amaliyoti”, iqtisodiy sudlar sudyalari uchun esa “Davlat xaridlari yuzasidan kelib chiqadigan nizolar” mavzularida o‘quv mashg‘ulotlari tashkil etildi.O‘quv mashg‘ulotlari Akademiya dotsenti E.Sabirov, Oliy sud sudyasi O'.Razikov, Akademiya o‘qituvchisi R.Berdiyarov hamda Namangan viloyat sudi raisining o‘rinbosari B.Isroilov tomonidan olib borildi.Ushbu kurslar sudyalar tomonidan murakkab toifadagi ishlarni ko‘rib chiqishda yagona sud amaliyotini shakllantirish, qonunchilikni to‘g‘ri qo‘llash hamda kasbiy bilim va ko‘nikmalarni yanada mustahkamlashga xizmat qiladi.

O‘zbekiston Respublikasi Oliy ta’lim, fan va innovatsiyalar vazirligi tomonidan davlat buyurtmasi asosida o‘tkazilgan ilmiy-tadqiqot loyihalari tanlovida O‘zbekiston Respublikasi Odil sudlov akademiyasining “Sudyalik lavozimiga nomzodlarning psixologik portretini shakllantiruvchi elektron dastur” hamda “Sud muhokamasi simulyatsiyasi” elektron platformasini ishlab chiqish loyihalari g‘olib deb topildi.Mazkur ikki loyiha uchun jami 3 milliard 593 million 651 ming so‘mlik davlat granti qo‘lga kiritildi.2026–2028-yillarda amalga oshiriladigan ushbu loyihalar sudyalik lavozimiga nomzodlarni zamonaviy yondashuvlar asosida baholash, sudyalar va sudyalikka nomzodlarning malakasini oshirish hamda sud tizimi uchun yuqori malakali kadrlar tayyorlashga xizmat qiladi.

Jizzax viloyatining Zomin tumanida O‘zbekiston Respublikasi Odil sudlov akademiyasi tomonidan O‘zbekiston Respublikasi Huquqni muhofaza qilish akademiyasi hamda Yevropada xavfsizlik va hamkorlik tashkiloti (YXHT) bilan hamkorlikda “Axborot texnologiyalari sohasidagi jinoyatlar: aniqlashdan sud hukmiga qadar” mavzusida o‘quv kursi tashkil etildi. 29–30-iyul kunlari o‘tkazilgan o‘quv kursida sudyalar axborot texnologiyalari sohasidagi jinoyatlarni aniqlash va sudda ko‘rib chiqish jarayonlariga oid zamonaviy yondashuvlar bilan tanishdilar.Mashg‘ulotlar davomida kiberjinoyatchilikka qarshi kurashishning amaliy jihatlari, raqamli kriminalistika imkoniyatlari, elektron dalillar bilan ishlash usullari, blokcheyn texnologiyalari, kriptoaktivlar bilan bog‘liq masalalar hamda boshqa dolzarb mavzular muhokama qilindi.O‘quv kursi yakunida ishtirokchilarga sertifikatlar topshirildi. Mazkur kurs sudyalar va soha vakillarining axborot texnologiyalari bilan bog‘liq ishlarni samarali ko‘rib chiqish borasidagi bilim va amaliy ko‘nikmalarini yanada mustahkamlashga xizmat qilishi ta’kidlandi.

Odil sudlov akademiyasi hamda O‘zbekiston ayol sudyalar assotsiatsiyasi o‘rtasida o‘zaro hamkorlikni yanada rivojlantirishga qaratilgan hamkorlik memorandumi imzolandi. Mazkur memorandum Akademiya va Assotsiatsiya o‘rtasida ta’lim, ilm-fan hamda amaliy faoliyat yo‘nalishlaridagi hamkorlikni mustahkamlash, sudyalar, xususan, ayol sudyalarning kasbiy salohiyatini yuksaltirish, zamonaviy bilim va ko‘nikmalarini rivojlantirish, shuningdek, sud-huquq sohasidagi ilmiy-tadqiqot ishlarini qo‘llab-quvvatlashga xizmat qiladi.

O‘zbekiston Respublikasi Odil sudlov akademiyasida Prezidentning 2025-yil 21-avgustdagi PF–141-son Farmoni ijrosi, Akademiyaning 2026-yil birinchi yarim yilligidagi faoliyati yakunlari, shuningdek, magistratura va kasbiy qayta tayyorlash kurslariga qabul jarayonlari haqida keng jamoatchilikni xabardor qilishga qaratilgan matbuot anjumani ochiq muloqot shaklida o‘tkazildi. Unda Sudyalar oliy kengashi vakili, Akademiya rahbariyati, ommaviy axborot vositalari vakillari ishtirok etdi. Tadbirda sud tizimi uchun malakali kadrlar tayyorlash, qabul jarayonlari, ta’lim va ilmiy-tadqiqot faoliyati, raqamlashtirish, xalqaro hamkorlik hamda istiqboldagi ustuvor vazifalar yuzasidan ma’lumot berildi.Tadbir yakunida ommaviy axborot vositalari vakillarini qiziqtirgan savollarga Akademiya rahbariyati tomonidan batafsil  javoblar berildi.

Odil sudlov akademiyasida Wakil AI sun'iy intellekt platformasini ishlab chiqqan mutaxassislar ishtirok etib, mazkur mahsulotning imkoniyatlari, ishlash tamoyillari hamda huquqiy faoliyatda qo‘llash istiqbollari yuzasidan taqdimot o‘tkazdilar. Taqdimot davomida platforma yordamida huquqiy ma'lumotlarni tezkor izlash, qonunchilik hujjatlarini tahlil qilish, huquqiy hujjatlar loyihalarini tayyorlash va boshqa intellektual xizmatlarni amalga oshirish imkoniyatlari namoyish etildi. Shuningdek, ishtirokchilarga sun'iy intellekt texnologiyalarini sud-huquq sohasida samarali qo‘llash, ularning afzalliklari hamda amaliyotdagi ahamiyati xususida batafsil ma'lumot berildi. Tadbir yakunida Akademiya professor-o‘qituvchilari va tinglovchilar o‘zlarini qiziqtirgan savollarga mutaxassislardan atroflicha javob oldilar.

Unda Akademiya faoliyatining ustuvor yo‘nalishlari bo‘yicha amalga oshirilayotgan ishlar tahlil qilinib, mavjud vazifalarni o‘z vaqtida va sifatli bajarish yuzasidan mas’ullarning axborotlari tinglandi.  Muhokamalar yakunida ta’lim sifati va ilmiy faoliyat samaradorligini yanada oshirishga qaratilgan tegishli qarorlar qabul qilindi hamda mas’ullarga aniq vazifalar belgilab berildi.

O‘zbekiston Respublikasi Odil sudlov akademiyasida Xalqaro sudyalar va sud xodimlari farovonligi kuni munosabati bilan tantanali tadbir bo‘lib o‘tdi. Unda O‘zbekiston Respublikasi Sudyalar oliy kengashi, Oliy sud rahbariyati va vakillari, Toshkent shahar va Toshkent viloyati sudlari, shuningdek, tumanlararo sudlar raislari va sudyalari ishtirok etdi. Tadbir davomida so‘nggi yillarda sud tizimida amalga oshirilayotgan islohotlar, sudyalar va sud apparati xodimlari uchun yaratilayotgan shart-sharoitlar hamda ularning kasbiy faoliyatini qo‘llab-quvvatlash va farovonligini ta’minlash borasida olib borilayotgan ishlar haqida so‘z yuritildi. Shuningdek, sud faxriylarining xotiralari tinglanib, o‘tgan yillardagi faoliyat tajribasi va bugungi kunda sud tizimida yaratilgan shart-sharoitlar xususida fikr almashildi.