O‘zbekiston Respublikasi Prezidenti Shavkat Mirziyoyevning 2026-yil 8-iyundagi “Sudlarda komplayens nazorat tizimi samaradorligini oshirishning qo‘shimcha chora-tadbirlari to‘g‘risida”gi farmoni mamlakatimizda sud-huquq tizimini modernizatsiya qilish yo‘lidagi navbatdagi tarixiy qadam bo‘ldi. Ushbu hujjat sud tizimida korrupsiyaga qarshi kurashni tubdan yangi pog‘onaga ko‘taruvchi, sud tizimida korrupsiyaviy omillarni barvaqt aniqlash va bartaraf etish bo‘yicha xalqaro andozalarga mos tizimni joriy etishni ko‘zlagan strategik islohotdir, desak mubolag‘a bo‘lmaydi. Farmonda belgilangan ustuvor vazifalar ichida Odil sudlov akademiyasi zimmasiga yuklatilgan vazifalar alohida ahamiyatga ega. Zero, sud tizimida korrupsiyaga qarshi samarali tizim yaratishda nazorat mexanizmlari bilan bir qatorda, yuksak ma’naviy-axloqiy fazilatlarga ega, halol va tashqi ta’sirlarga bardoshli sudyalar korpusini shakllantirish hamda bu madaniyatni institutlashtirish talab etiladi. Aynan Odil sudlov akademiyasi ushbu strategik vazifani hayotga tatbiq etuvchi asosiy tuzilma sifatida namoyon bo‘lmoqda. O‘zbekiston 2016 yildan boshlab sud-huquq sohasida keng ko‘lamli transformatsiyani amalga oshirib kelmoqda. Bu yo‘lda qabul qilingan har bir hujjat keyingisining poydevorini yaratdi. Xususan, O‘zbekiston Respublikasi Prezidentining 2025yil 26 dekabrdagi Oliy Majlis va O‘zbekiston xalqiga yo‘llagan Murojaatnomasida ham bu masalaga alohida urg‘u berildi: “Korrupsiya – davlat taraqqiyotiga to‘siq bo‘ladigan, adolat va qonun ustuvorligini izdan chiqaradigan, jamiyatda ishonch muhitini zaiflashtiradigan eng jiddiy tahdid” deb ta’riflangan bu illatga qarshi 2026-yil “favqulodda holat” deb e’lon qilindi. Mazkur farmon sohadagi izchil va tizimli islohotlarning mantiqiy davomidir. Hujjat sud tizimidagi korrupsiyaviy xavf-xatarlarni aniqlash va baholashning professional mexanizmini yaratish, shaffof kadrlar siyosatini yo‘lga qo‘yish hamda sud hokimiyatiga nisbatan jamoatchilik ishonchini mustahkamlashni o‘z oldiga bosh maqsad qilib qo‘ygan. O‘z mohiyatiga ko‘ra, ushbu hujjat sud-huquq tizimini tubdan takomillashtirishga qaratilgan strategik islohotlarning ajralmas qismidir. Unda, bir tomondan, Komplayens nazorat xizmatini tashkil etish, sud apparatida shaffof kadrlar siyosatini yuritish, “vacancy.sud.uz” va “SudHR” platformalarini amaliyotga joriy qilish hamda manfaatlar to‘qnashuvini monitoring qilish tizimlarini o‘rnatish ko‘zda tutilgan bo‘lsa, ikkinchi tomondan, Odil sudlov akademiyasi orqali kadrlar tayyorlash sifatini mutlaqo yangi bosqichga ko‘tarish belgilanmoqda. Mazkur ikki yo‘nalish tizimda bir-birini to‘ldiruvchi va kuchaytiruvchi sinergetik ta’sirga ega. Shundan kelib chiqib, farmon Odil sudlov akademiyasi zimmasiga bir nechta strategik yo‘nalishlardagi muhim vazifalarni yuklaydi. Birinchi yo‘nalish – korrupsiyaga qarshi barqarorlik darajasi diagnostikasi. Akademiya va Boshqaruv samaradorligi agentligi huzuridagi Rahbar kadrlarni baholash markazi bilan birgalikda 2026 yil yakuniga qadar sud tizimida korrupsiyaga qarshi barqarorlik darajasini kompleks diagnostikadan o‘tkazish belgilangan. Bu shunchaki tekshiruv emas, tizimning hozirgi holatini ilmiy asosda baholash, xavf manbalarini aniqlash va profilaktik choralar ishlab chiqish demakdir. Ikkinchi yo‘nalish – bo‘lajak sudyalarning bilimi va ma’naviy qiyofasini baholashning yangi tizimi. Bundan buyon sudyalikka nomzodlarni tayyorlash jarayonida ularning shaxsiy professional xususiyatlari va korrupsiyaga qarshi barqarorlik darajasini diagnostikadan o‘tkazish amaliyoti joriy etiladi. Bu mexanizm nomzodning huquqiy bilimidan tashqari, uning halollik darajasini, axloqiy pozitsiyasini va noqonuniy harakatlarga qarshi tura olish qobiliyatini ham baholaydi. Natijada, sud hokimiyatiga korrupsiyaviy xavflarga qarshi immunitetga ega kadrlarning kirib kelish ehtimoli sezilarli darajada ortishiga asos bo‘ladi. Uchinchi yo‘nalish – “real keyslar”ga asoslangan o‘quv moduli. 2026-yilning sentabriga qadar Akademiyada manfaatlar to‘qnashuvi va korrupsiyaning boshqa ko‘rinishlarini oldini olishga qaratilgan o‘quv-amaliy modul joriy etilishi belgilangan. Bu modulda tinglovchilar amaliyotda duch keladigan murakkab vaziyatlarni tahlil qilish, xavflarni aniqlash va qonuniy yechimlarni ishlab chiqish ko‘nikmalarini hosil qiladi. Nazariy bilimlar asosiga qurilgan amaliy immunitetni shakllantirish ana shu modulning asosiy maqsadi sanaladi. To‘rtinchi yo‘nalish – ichki xavfsizlik nazorati xizmatini tashkil etish. Farmonda Odil sudlov akademiyasida 2026-yil 1-sentabrga qadar mavjud boshqaruv shtat birliklari hisobidan ichki xavfsizlik nazorati xizmatini tuzish vazifasi belgilangan. Korrupsiyaga qarshi kurashdan saboq beruvchi maskanning o‘zi birinchi navbatda ushbu tamoyillarga qat’iy rioya etishi lozim. Bu tizimning shaffofligi, Akademiyaning institutsional nufuzi va unga bo‘lgan ijtimoiy ishonchning muhim kafolati hisoblanadi. Beshinchi yo‘nalish – xalqaro standart bo‘yicha audit. 2027 yil 1 iyunga qadar Akademiyani ISO 37001 – korrupsiyaga qarshi kurashish menejmenti tizimi xalqaro standarti bo‘yicha auditdan o‘tkazish vazifasi belgilangan. Bu mamlakatimiz sud-huquq tizimini xalqaro maydonda tan olingan ilg‘or amaliyotlarga moslashtirish yo‘lidagi navbatdagi muhim qadam hisoblanadi. Oltinchi yo‘nalish – uzluksiz malaka oshirish. Sudyalar oliy kengashi Oliy sud va Akademiya bilan birgalikda sudyalar va sud apparati xodimlarining har uch yilda korrupsiyaga qarshi kurashish bo‘yicha o‘quv kurslarida malakasini oshirish tizimini joriy etadi. Bu korrupsiyaga qarshi kurashni bir martalik tadbir emas, balki uzluksiz jarayonga aylantiradi. Farmonda qayd etilgan mazkur vazifalar Odil sudlov akademiyasi zimmasiga ulkan mas’uliyat yuklaydi. Binobarin, davlatimiz rahbari Odil sudlov akademiyasiga sud tizimini yuksak ma’naviyatga, chuqur bilim va ko‘nikmaga ega bo‘lgan munosib kadrlar bilan shakllantirish missiyasini ishonib topshirmoqda. Korrupsiyaga qarshi kurashning haqiqiy mevasi faqatgina nazorat va jazolash orqali emas, balki to‘g‘ri tarbiyalangan, mustahkam kasbiy immunitetga ega sudyalar orqali erishiladi va bu vazifani amalga oshirishda Akademiyaning o‘rni va mas’uliyati alohida ahamiyat kasb etadi. Shu bois farmonning ijrosi Akademiya jamoasidan jiddiy tayyorgarlik, metodologik izlanish va professional yondashuvni talab etadi. Bu borada Akademiyada tinglovchilarni belgilangan tartibda diagnostikadan o‘tkazish tizimi joriy etiladi, yangi o‘quv dasturlari ishlab chiqiladi, ichki xavfsizlik nazorati tizimi yo‘lga qo‘yiladi, xalqaro standartlarga muvofiqlik ta’minlanadi. O‘zbekiston Respublikasi Prezidentining mazkur farmoni Odil sudlov akademiyasi uchun tarixiy ahamiyat kasb etadi. Hujjat Akademiyaga diagnostika, ta’lim, nazorat va xalqaro standartlashtirish yo‘nalishlarida aniq va muddatli vazifalar yuklamoqda. Ushbu vazifalarning tub mohiyati va hal qiluvchi ahamiyati shundaki, ular sud tizimining ma’naviy-axloqiy poydevorini tubdan mustahkamlashga qaratilgandir. Akademiya jamoasi mazkur Farmon ijrosini yuksak mas’uliyat va qat’iyat bilan qabul qilmoqda. Bizga bildirilgan yuksak ishonchni to‘liq oqlash, davlatimiz rahbari tomonidan belgilangan strategik islohotlar muvaffaqiyatiga sidqidildan hissa qo‘shish hamda mamlakatimizda adolatli odil sudlov tizimini qaror toptirish oliy va muqaddas maqsadimizdir. Sherzod Abduqodirov, O‘zbekiston Respublikasi Odil sudlov akademiyasi rektori

Akademiya rektori Sh. Abduqodirov boshchiligida O‘zbekiston Respublikasi Prezidentining “Sudlarda komplayens nazorat tizimi samaradorligini oshirishning qo‘shimcha chora-tadbirlari to‘g‘risida”gi Farmoni mazmun-mohiyatiga bag‘ishlangan kengaytirilgan tezkor yig‘ilish o‘tkazildi.Yig‘ilishda Farmonda Odil sudlov akademiyasi zimmasiga yuklatilgan vazifalar muhokama qilinib, ularning ijrosini o‘z vaqtida va sifatli ta’minlash yuzasidan tegishli topshiriqlar berildi.  

• Oliy sud tizimida alohida Komplayens nazorat xizmati tashkil etiladi.• Sud apparati xodimlarini ishga qabul qilishda ochiq tanlov va meritokratiya tamoyillari joriy etiladi.• Sud apparatiga ishga qabul qilish jarayonlarida sun’iy intellekt va raqamli texnologiyalardan foydalaniladi.• Sud apparati xodimlari uchun manfaatlar to‘qnashuvi va mol-mulkni deklaratsiya qilish tizimi yo‘lga qo‘yiladi.• Korrupsiya haqida xabar bergan xodimlarni himoya qilish va rag‘batlantirish mexanizmi joriy etiladi.• Sud tizimida kadrlar bilan ishlash uchun “vacancy.sud.uz” portali va “SudHR” elektron platformasi ishga tushiriladi.• Sudlarda korrupsiyaviy xavf-xatarlarni boshqarishning elektron tizimi yaratiladi.• Sudyalikka nomzodlarni tayyorlashda shaxsiy-professional va korrupsiyaga qarshi barqarorlik diagnostikasi joriy etiladi.• Odil sudlov akademiyasida korrupsiyaning oldini olish bo‘yicha “real keyslar”ga asoslangan o‘quv modullari tashkil etiladi.• Odil sudlov akademiyasini ISO 37001 korrupsiyaga qarshi kurashish menejmenti tizimi xalqaro standarti bo‘yicha auditdan o‘tkazish belgilanmoqda.• Odil sudlov akademiyasida ichki xavfsizlik nazorati xizmati tashkil etiladi.• Sudyalar va sud apparati xodimlari har uch yilda korrupsiyaga qarshi kurashish bo‘yicha majburiy malaka oshirish kurslarida ishtirok etadi.• Sud ishlarini avtomatik taqsimlash tizimi yanada takomillashtiriladi.Mazkur Farmon bilan sud tizimida korrupsiyaning oldini olish, kadrlar tanlovini raqamlashtirish, shaffoflik va hisobdorlikni kuchaytirishga qaratilgan mutlaqo yangi, zamonaviy boshqaruv tizimi joriy etilmoqda.

O‘zbekiston Respublikasi Odil sudlov akademiyasida viloyat va ularga tenglashtirilgan sudlar raislari o‘rinbosarlari uchun tashkil etilgan malaka oshirish kursining yopilish marosimi bo‘lib o‘tdi. O‘quv dasturi sud-huquq sohasidagi islohotlarning mazmun-mohiyati, sudlarda ommaviy axborot vositalari bilan samarali hamkorlikni yo‘lga qo‘yish, zamonaviy geosiyosiy jarayonlar, stress va vaqtni boshqarish, shuningdek, sud amaliyotining dolzarb masalalariga bag‘ishlangan mavzularni qamrab oldi.Shuningdek, tinglovchilar Oliy sud faoliyati bilan yaqindan tanishib, jinoyat, fuqarolik, ma’muriy va iqtisodiy ishlar bo‘yicha sud amaliyotini tahlil qilishga qaratilgan amaliy mashg‘ulotlarda ham ishtirok etdilar.Mazkur malaka oshirish kursi sud raislari o‘rinbosarlarining kasbiy bilim va ko‘nikmalarini yanada mustahkamlash, boshqaruv salohiyatini oshirish hamda odil sudlov sifatini yuksaltirishga xizmat qiladi.Tadbir yakunida kursni muvaffaqiyatli tamomlagan tinglovchilarga malaka oshirish kursini tugatganlik to‘g‘risidagi sertifikatlar topshirildi.

O‘zbekiston Respublikasi Odil sudlov akademiyasida Xalqaro adolat va qonun ustuvorligi instituti (IIJ, Malta) delegatsiyasi bilan uchrashuv bo‘lib o‘tdi. Uchrashuvda ikki muassasa o‘rtasidagi hamkorlikni yanada rivojlantirish istiqbollari muhokama qilinib, xususan, 2026-yil kuzida Akademiya tinglovchilari va professor-o‘qituvchilari uchun terrorizm hamda kiberjinoyatchilikka qarshi kurashish masalalariga bag‘ishlangan 7 kunlik xalqaro treningni tashkil etish yuzasidan fikr almashildi.Shuningdek, kadrlar salohiyatini oshirish, ilg‘or xalqaro tajribani ta’lim jarayoniga joriy etish, o‘zaro anglashuv memorandumini imzolash hamda qo‘shma ta’lim va ilmiy-tadqiqot loyihalarini amalga oshirish istiqbollari ko‘rib chiqildi.Uchrashuv yakunida tomonlar o‘zaro manfaatli hamkorlikni yanada kengaytirish va yangi qo‘shma tashabbuslarni amalga oshirishga tayyor ekanliklarini bildirdilar.

Bugun O‘zbekiston Respublikasi Odil sudlov akademiyasi hamda O‘zbekiston Respublikasi Korrupsiyaga qarshi kurashish agentligi o‘rtasida hamkorlik memorandumini imzolash marosimi bo‘lib o‘tdi. Tadbir davomida tomonlar korrupsiyaga qarshi kurashish sohasida kadrlar tayyorlash, ilmiy-tadqiqot faoliyatini rivojlantirish, zamonaviy ta’lim dasturlarini joriy etish hamda o‘zaro tajriba almashish masalalarini muhokama qildilar.Uchrashuvda mazkur hamkorlik korrupsiyaga qarshi murosasiz munosabatni shakllantirish, sohada yuqori malakali kadrlar tayyorlash va ilmiy salohiyatni yanada oshirishga xizmat qilishi ta’kidlandi.Tadbir yakunida Odil sudlov akademiyasi va Korrupsiyaga qarshi kurashish agentligi o‘rtasida hamkorlik memorandumi imzolandi.

O‘zbekiston Respublikasi Odil sudlov akademiyasida BMTning Inson huquqlari bo‘yicha Oliy komissari Boshqarmasining Markaziy Osiyo bo‘yicha mintaqaviy bo‘linmasi vakillari bilan uchrashuv bo‘lib o‘tdi. Uchrashuvda inson huquqlari sohasidagi hamkorlikning istiqbolli yo‘nalishlari, yuridik ta’lim yo‘nalishi talabalari uchun BMTning inson huquqlari tizimi va xalqaro standartlari bo‘yicha ma’rifiy mashg‘ulotlarni tashkil etish masalalari muhokama qilindi.Shuningdek, BMTning Inson huquqlari bo‘yicha Oliy komissari Boshqarmasining Markaziy Osiyo mintaqasidagi ustuvor faoliyat yo‘nalishlari yuzasidan fikr almashilib, kelgusidagi hamkorlik istiqbollari ko‘rib chiqildi.Tadbir konstruktiv muloqot ruhida o‘tib, tomonlar o‘rtasidagi hamkorlikni yanada rivojlantirish yuzasidan o‘zaro manfaatli takliflar bildirildi.

Bugun O‘zbekiston Respublikasi Odil sudlov akademiyasi hamda O‘zbekiston Respublikasi Ichki ishlar vazirligi akademiyasi o‘rtasida hamkorlik memorandumini imzolash marosimi bo‘lib o‘tdi. Tadbir davomida tomonlar o‘rtasidagi hamkorlikni yanada rivojlantirish istiqbollari muhokama qilinib, ta’lim, ilmiy-tadqiqot va amaliy faoliyat yo‘nalishlarida o‘zaro manfaatli hamkorlikni kengaytirish masalalari yuzasidan fikr almashildi.Uchrashuvda mazkur hamkorlik ikki ta’lim muassasasining ilmiy va pedagogik salohiyatini yanada mustahkamlash, malakali kadrlar tayyorlash sifatini oshirish hamda o‘zaro manfaatli aloqalarni rivojlantirishga xizmat qilishi ta’kidlandi.Tadbir yakunida O‘zbekiston Respublikasi Odil sudlov akademiyasi hamda O‘zbekiston Respublikasi Ichki ishlar vazirligi akademiyasi o‘rtasida hamkorlik memorandumi imzolandi.

O‘zbekiston Respublikasi Odil sudlov akademiyasida viloyat va ularga tenglashtirilgan sudlar raislarining o‘rinbosarlari uchun malaka oshirish kursining ochilish marosimi bo‘lib o‘tdi. Mazkur o‘quv kursida respublikaning barcha hududlaridan tashrif buyurgan 35 nafar sud raislari o‘rinbosarlari ishtirok etmoqda. Kurs 5 kun davomida o‘tkazilib, jami 38 akademik soatga mo‘ljallangan.Kursning ochilish marosimida O‘zbekiston Respublikasi Sudyalar oliy kengashi raisi X.Yodgorov hamda O‘zbekiston Respublikasi Oliy sudi raisining birinchi o‘rinbosari A.Usmonov ishtirok etib, sud-huquq sohasida amalga oshirilayotgan keng ko‘lamli islohotlar, sud tizimida professional kadrlar salohiyatini oshirish hamda rahbar xodimlarning mas’uliyati haqida ma’ruza qildilar.O‘quv dasturi sud-huquq sohasidagi islohotlarning mazmun-mohiyati, sudlarda ommaviy axborot vositalari bilan samarali hamkorlikni yo‘lga qo‘yish, zamonaviy geosiyosiy jarayonlar, stress va vaqtni boshqarish, shuningdek, sud amaliyotining dolzarb masalalariga bag‘ishlangan mavzularni qamrab olgan.Shuningdek, tinglovchilar Oliy sud faoliyati bilan yaqindan tanishish, jinoyat, fuqarolik, ma'muriy va iqtisodiy ishlar bo‘yicha sud amaliyotini tahlil qilishga qaratilgan amaliy mashg‘ulotlarda ham ishtirok etadilar.Malaka oshirish kursi sud raislari o‘rinbosarlarining kasbiy bilim va ko‘nikmalarini yanada mustahkamlash, boshqaruv salohiyatini oshirish hamda odil sudlov sifatini yuksaltirishga xizmat qiladi.