O‘zbekiston Respublikasi Odil sudlov akademiyasi hamda Toshkent shahridagi Xalqaro Ishbilarmon Ayollar Assotsiatsiyasi o‘rtasida hamkorlik memorandumi imzolandi. Memorandum doirasida ta’lim va amaliyot integratsiyasini rivojlantirish, zamonaviy kasbiy kompetensiyalarni shakllantirish, xotin-qizlarning huquqiy savodxonligi va kasbiy salohiyatini oshirish, shuningdek, tadbirkor ayollarni huquqiy va kasbiy jihatdan qo‘llab-quvvatlashga qaratilgan qo‘shma loyihalarni amalga oshirish ko‘zda tutilgan.Hamkorlik amaliy ta’lim, ekspertlik faoliyati, huquqiy ma’rifat va xotin-qizlar tadbirkorligini qo‘llab-quvvatlash yo‘nalishlarida yangi imkoniyatlar yaratadi.

Odil sudlov akademiyasi mutaxassisi ishtirokida Toshkent viloyati sudida «Sudyalarning psixologik barqarorligini ta’minlash» mavzusida mahorat darsi va seminar-trening tashkil etildi. Sudyalik kasbi nafaqat qonunlarni mukammal bilishni, balki yuqori stress va kuchli ruhiy bosim ostida ham to‘g‘ri qaror qabul qila olishni talab etadi. Seminar davomida soha mutaxassislari va psixologlar sudyalarga ish jarayonidagi emotsional toliqishning oldini olish, hissiyotlarni boshqarish va murakkab vaziyatlarda vazminlikni saqlash bo‘yicha foydali tavsiyalar berishdi.Treningning asosiy mavzulari:✅Stressni yengish: Ish hajmi ko‘pligida ruhiy charchoqdan xalos bo‘lish usullari.✅Nizoli vaziyatlar: Sud majlisi qatnashchilari bilan muloqotda vazminlikni saqlash.✅Diqqatni jamlash: Qaror qabul qilishda hissiyotlarga berilmaslik va xolislikni ta’minlash.Bu kabi amaliy mashg‘ulotlar sudyalarning nafaqat ruhiy salomatligini asrashga, balki viloyatimizda odil sudlov sifatini yanada oshirishga xizmat qiladi.

O‘zbekiston Respublikasi Odil sudlov akademiyasi Fuqarolik-huquqiy fanlar kafedrasi tomonidan “Vorislik huquqini takomillashtirish masalalari: xorijiy tajriba” mavzusida Respublika ilmiy-amaliy konferensiyasi tashkil etildi. Tadbirda Akademiya professor-o‘qituvchilari, sudyalar, huquqshunos olimlar hamda sohaning amaliyotchi mutaxassislari ishtirok etdilar.Konferensiya davomida vorislik huquqining nazariy va amaliy jihatlari, vorislik munosabatlarini huquqiy tartibga solishdagi mavjud muammolar, sud amaliyotida uchrayotgan masalalar hamda ularni hal etishda xorijiy tajribadan foydalanish imkoniyatlari muhokama qilindi.Shuningdek, vorislikka oid nizolarni sudda ko‘rish, vasiyatnoma va qonun bo‘yicha vorislik, majburiy ulush, voyaga yetmaganlar hamda ota-ona qaramog‘idan mahrum bo‘lgan bolalarning vorislik huquqlari, raqamli aktivlar va raqamli merosning huquqiy maqomi kabi dolzarb masalalar yuzasidan fikr va mulohazalar bildirildi.

O‘zbekiston Respublikasi Odil sudlov akademiyasi hamda O‘zbekiston Respublikasi Notarial palatasi o‘rtasida o‘zaro hamkorlik to‘g‘risidagi memorandum imzolandi.Mazkur hujjat ta’lim, ilm-fan va amaliyot uyg‘unligini ta’minlash, sud va notariat amaliyoti o‘rtasidagi hamkorlikni yanada kuchaytirish hamda yuqori malakali yuridik kadrlarni tayyorlash jarayonini takomillashtirishga qaratilgan. Hamkorlik doirasida:sudyalar, tinglovchilar va notariat sohasi vakillarining bilim va amaliy ko‘nikmalarini oshirish;dolzarb masalalar bo‘yicha qo‘shma ilmiy-tahliliy tadqiqotlar olib borish;malaka oshirish va o‘quv kurslari, seminarlar, davra suhbatlari hamda ilmiy-amaliy tadbirlarni tashkil etish;tajribali notariuslar va Notarial palataning yuqori malakali mutaxassislarini Akademiyaning o‘quv jarayonlariga jalb etish;tinglovchilarning notariat sohasidagi amaliy ko‘nikmalarini shakllantirish kabi yo‘nalishlarda hamkorlik qilish ko‘zda tutilmoqda.Shuningdek, sud va notariat faoliyatini raqamlashtirish, axborot texnologiyalari va sun’iy intellekt imkoniyatlaridan samarali foydalanish, xorijiy tajribani o‘rganish hamda ilg‘or amaliyotlarni joriy etish masalalariga alohida e’tibor qaratiladi.

O‘zbekiston Milliy axborot agentligi — O‘zAda O‘zbekiston Respublikasi Odil sudlov akademiyasi rektori, yuridik fanlar doktori Sherzod Abduqodirovning “Tergov yoki sud ishlarini hal etishga aralashganlik va sudga hurmatsizlik uchun qanday javobgarlik belgilandi?” mavzusidagi sharhi e’lon qilindi. Unda 2026-yil 11-sentabrdagi Qonun asosida Jinoyat kodeksining 236-moddasi hamda Ma’muriy javobgarlik to‘g‘risidagi kodeksning 180-moddasiga kiritilgan o‘zgartirishlarning mazmun-mohiyati haqida so‘z yuritilgan.Xususan, tergov faoliyatiga va sud ishlarini hal etishga noqonuniy aralashish bilan bog‘liq harakatlarni alohida jinoyat tarkiblari sifatida ajratish, mansabdor shaxslarning xizmat mavqeyidan foydalangan holda aralashuvi uchun kuchaytirilgan javobgarlik belgilash, shuningdek, sudga hurmatsizlik uchun javobgarlik doirasini sud majlisi bilan bir qatorda sud binosida sodir etilgan hurmatsizlik harakatlariga ham tatbiq etish masalalari yoritilgan.Mazkur o‘zgartirishlar sud hokimiyatining mustaqilligini yanada mustahkamlash, odil sudlovni har qanday noqonuniy ta’sirdan himoya qilish hamda sud nufuzini ta’minlashga xizmat qilishi qayd etilgan. Batafsil: O‘zA saytida o‘qish

“Yangi O‘zbekiston” gazetasida O‘zbekiston Respublikasi Odil sudlov akademiyasi Inson huquqlari, xalqaro huquq va ijtimoiy-gumanitar fanlar kafedrasi o‘qituvchisi Avazbek Yuldoshbekovning “Odil sudlov – 2030” strategiyasi va sud amaliyotini ilmiy tahlil qilish masalalariga bag‘ishlangan maqolasi e’lon qilindi. Maqolada O‘zbekiston Respublikasi Prezidentining 2026-yil 14-avgustdagi “Odil sudlov – 2030”: Yangi O‘zbekistonda inson huquqlarini ishonchli himoya qiluvchi xalqchil va adolatli sud tizimini barpo etish strategiyasi to‘g‘risida”gi PF–160-son Farmoni bilan belgilangan vazifalar, xususan, yagona sud amaliyotini shakllantirish, sud faoliyatining ochiqligini oshirish hamda sud amaliyotini ilmiy asosda tahlil qilish masalalari yoritilgan.Shuningdek, maqolada Odil sudlov akademiyasida “Sud amaliyotini tahlil qilish ilmiy-tadqiqot markazi”ni tashkil etish, sud statistikasini muntazam tahlil qilish, bekor qilingan va o‘zgartirilgan sud qarorlari dinamikasini o‘rganish hamda sud-huquq sohasidagi qonunchilikni takomillashtirish bo‘yicha ilmiy asoslangan tavsiyalar ishlab chiqish taklif etilgan.Natijada, sud amaliyotini ilmiy tahlil qilish, ta’lim jarayoni va amaliyot o‘rtasidagi uzviylikni ta’minlash, o‘quv dasturlarini real amaliyotdagi muammolardan kelib chiqqan holda shakllantirish imkoniyati yaratilishi qayd etilgan.

O‘zbekiston Respublikasi Odil sudlov akademiyasi hamda O‘zbekiston yoshlar ittifoqi Markaziy Kengashi o‘rtasida imzolangan mazkur o‘zaro anglashuv memorandumi yoshlarning huquqiy madaniyatini yuksaltirish va ularning jamiyatdagi faol ishtirokini ta’minlashga qaratilganligi bilan ahamiyatlidir. Memorandum ikki tashkilot o‘rtasidagi muloqotni yanada rivojlantirish, yoshlarning huquqiy bilim va ko‘nikmalarini oshirish, ularning sud-huquq sohasidagi islohotlar jarayonidagi ishtirokini kengaytirish hamda yoshlar bilan ishlash bo‘yicha qo‘shma loyihalarni amalga oshirishga xizmat qilishi kutilmoqda.Shuningdek, memorandum doirasida yoshlar uchun huquqiy targ‘ibot tadbirlari, ta’lim loyihalari, seminar va treninglar tashkil etish, ilg‘or tajribalarni almashish hamda istiqbolli tashabbuslarni qo‘llab-quvvatlash bo‘yicha birgalikdagi ishlarni yo‘lga qo‘yish nazarda tutilgan.

Bugun Odil sudlov akademiyasida kechki ta’lim shaklida tahsil olayotgan magistrantlar uchun yangi o‘quv jarayonining mashg‘ulotlari tashkil etildi. Dars mashg‘ulotlaridan biri Akademiyaning Jinoyat-huquqiy fanlar kafedrasi mudiri T.Obidov tomonidan o‘tkazildi.Mashg‘ulot davomida magistrantlarga “Mustaqillik darsi” doirasida O‘zbekiston Respublikasida mustaqillik yillarida, xususan, so‘nggi 35 yil mobaynida sud tizimida amalga oshirilgan islohotlar, ularning mazmun-mohiyati hamda erishilgan natijalar haqida batafsil ma’lumot berildi.Shuningdek, sud-huquq tizimini takomillashtirish, sud hokimiyatining mustaqilligini ta’minlash, fuqarolarning huquq va erkinliklarini ishonchli himoya qilish borasida amalga oshirilgan izchil islohotlarga alohida e’tibor qaratildi.Mashg‘ulot savol-javob va fikr almashish tarzida qiziqarli va mazmunli o‘tdi.Kechki ta’lim shaklidagi magistratura mashg‘ulotlarining boshlanishi magistrantlarning nazariy bilimlarini chuqurlashtirish, ularni amaliyot bilan uyg‘unlashtirish hamda kasbiy salohiyatini yanada oshirishga xizmat qiladi.

Sudyalik faoliyati chuqur huquqiy bilim bilan birga tahliliy fikrlash, inson tabiatini anglash, vaqtni to‘g‘ri boshqarish, nutq madaniyati va doimiy kasbiy rivojlanishni talab etadi. Shu maqsadda Odil sudlov akademiyasi Axborot-resurs markazi sudyalar uchun quyidagi kitoblarni tavsiya etadi.📖 BADIIY VA HUQUQIY-FALSAFIY ADABIYOTLAR1️⃣ “Graf Monte-Kristo” — Aleksandr DyumaAdolat, qasos, kechirim va inson taqdiri haqidagi asar. Adolat bilan shaxsiy qasos o‘rtasidagi nozik chegara haqida mulohaza yuritishga undaydi. 2️⃣ “Jinoyat va jazo” — Fyodor DostoyevskiyAyb, vijdon, jazo va javobgarlikning huquqiy hamda axloqiy jihatlarini chuqur yoritadi. 3️⃣ “Jarayon” — Frans KafkaOdil sudlov, protsessual kafolatlar, shaxs huquqlari va byurokratik tizimning inson taqdiriga ta’siri haqida mushohada qilishga undaydi. 4️⃣ “1984” — Jorj OruellDavlat hokimiyati, shaxs erkinligi, kuzatuv va axborot ustidan nazorat kabi masalalarni ko‘taradi. 5️⃣ “O‘nta negr bolasi” — Agata KristiDalillarni tahlil qilish, turli ehtimollarni solishtirish va voqealar o‘rtasidagi bog‘liqlikni aniqlashga asoslangan mashhur detektiv asar. 6️⃣ “Qonunlar ruhi haqida” — Sharl Lui MonteskyoHokimiyatlar bo‘linishi, qonunlarning mohiyati va davlat boshqaruvining huquqiy asoslariga bag‘ishlangan fundamental asar. Sud hokimiyatining davlat va jamiyatdagi o‘rnini kengroq anglash uchun muhim manba. ⏳ KASBIY RIVOJLANISHGA OID KITOBLAR7️⃣ “Vaqtni boshqarish” — Doktor Ibrohim Al-FiqhiyVaqtdan unumli foydalanish, ustuvor vazifalarni belgilash va kundalik faoliyatni samarali tashkil etish usullariga bag‘ishlangan. 8️⃣ “Time Management” — Brayan TreysiVazifalarni ustuvorlik asosida rejalashtirish, vaqt yo‘qotishlarini kamaytirish va ish samaradorligini oshirish yo‘llarini ko‘rsatadi. 9️⃣ “Diqqat: Chalg‘ituvchi dunyoda muvaffaqiyat sirlari” — Kel NyuportDiqqatni jamlash, chalg‘ituvchi omillarni kamaytirish va murakkab intellektual vazifalarni sifatli bajarishga yordam beradi. 🔟 “Atom odatlar” — James KlirKichik va muntazam odatlar orqali samarali ish tizimini shakllantirish hamda uzoq muddatli natijalarga erishish tamoyillarini tushuntiradi. 1️⃣1️⃣ “Notiqlik san'ati” — SitseronUstuvorlik, mas’uliyat, samarali muloqot, yetakchilik va doimiy rivojlanishga oid tamoyillarni yoritadi. 1️⃣2️⃣ “Notiqlik mahorati” — Rahimboy JumaniyozovFikrni aniq, ravon va ta’sirchan ifodalash, nutq madaniyati hamda auditoriya bilan samarali muloqot qilish ko‘nikmalarini rivojlantirishga xizmat qiladi. Sudyaning kasbiy nutqi va muloqot madaniyati uchun ayniqsa foydali. 1️⃣3️⃣"Sun'iy intellekt: uni qanday tushunish lozim?" — Richard SasskindUshbu kitob tushunishga oson va qiziqarli yozilgan boʻlib, sunʼiy intellekt nimaligidan xabardor boʻlgan va uning oqibatlaridan tashvish chekayotgan mutaxassisga ham, yon-atrofimizda roʻy berayotgan ulkan oʻzgarishlarning miqyosini tushunishi zarur boʻlgan oddiy kitobxonga ham birday manzur boʻladi. Bu – sunʼiy intellekt inqilobiga qiziqqan har bir inson albatta oʻqishi lozim Barcha yuqoridagi adabiyotlar o'zbek tilida mavjud.Sudyaning kasbiy salohiyati faqat qonunlarni bilish bilan cheklanmaydi. Badiiy, huquqiy-falsafiy va kasbiy adabiyotlar mutolaasi tahliliy fikrlashni rivojlantirish, inson tabiatini anglash va kasbiy mahoratni muntazam oshirishga xizmat qiladi.