Odil sudlov akademiyasida Innovatsion rivojlanish agentligi huzuridagi Ilmiy-texnik axborot markazi bilan hamkorlikda “Axborot resurslari bilan ishlashda Scopus, Web of Science va Springer Nature kabi xalqaro bazalaridan foydalanish amaliyotini rivojlantirish” mavzusida seminar-trening o‘tkazildi. Seminar-trening doirasida Ilmiy tahririyat va noshirlik boshqarmasi bosh mutaxassisi, “Ilm-fan va innovatsion rivojlanish” xalqaro ilmiy-texnikaviy jurnali bosh muharriri, falsafa doktori (PhD) Xilola Saloyeva tomonidan “Ilmiy maqolani rasmiylashtirishda sun’iy intellekt imkoniyatlaridan to‘g‘ri foydalanish” mavzusida ma’ruza qilindi.Mashg‘ulot davomida ilmiy maqolalarni tayyorlash va rasmiylashtirishda sun’iy intellekt vositalaridan maqsadli va mas’uliyatli foydalanish, ilmiy manbalar bilan ishlash, axborotni tahlil qilish hamda tadqiqot natijalarini xalqaro talablar asosida taqdim etishga oid amaliy tavsiyalar berildi.Tadbir yakunida ishtirokchilarni qiziqtirgan savollar yuzasidan fikr almashildi va savol-javoblar o‘tkazildi.

Odil sudlov akademiyasida Innovatsion rivojlanish agentligi huzuridagi Ilmiy-texnik axborot markazi bilan hamkorlikda o‘tkazilgan seminar-treningdan so‘ng O‘zbekiston Respublikasi Odil sudlov akademiyasining ilmiy, innovatsiyalar va axborot-tahliliy ishlar bo‘yicha prorektori N.Salayev bilan uchrashuv tashkil etildi.Uchrashuv davomida ikki tashkilot o‘rtasidagi hamkorlikni yanada rivojlantirish, ilmiy va axborot-tahliliy yo‘nalishlarda qo‘shma tashabbuslarni amalga oshirish, ilmiy-tadqiqot faoliyatini qo‘llab-quvvatlash hamda zamonaviy axborot resurslari va raqamli imkoniyatlardan samarali foydalanish masalalari muhokama qilindi.Shuningdek, kelgusida mutaxassislar uchun amaliy seminarlar, treninglar va boshqa qo‘shma loyihalarni muntazam tashkil etish, tajriba almashish hamda o‘zaro manfaatli hamkorlikni yangi bosqichga olib chiqish yuzasidan fikr almashildi.Uchrashuv yakunida tomonlar o‘zaro hamkorlikni izchil davom ettirish va yangi qo‘shma tashabbuslarni amalga oshirishga kelishib oldilar.

O‘zbekiston Respublikasi Odil sudlov akademiyasida “Sud faoliyati” mutaxassisligi bo‘yicha amaliy magistratura dasturiga qabul qilingan tinglovchilar uchun yangi o‘quv yilining ochilish marosimi bo‘lib o‘tdi. Mazkur amaliy magistratura dasturi O‘zbekiston Respublikasi Prezidentining 2025-yil 21-avgustdagi “Odil sudlov sohasida yuqori malakali kadrlar tayyorlash tizimini tubdan takomillashtirish chora-tadbirlari to‘g‘risida”gi PF–141-son Farmoniga muvofiq 2026/2027-o‘quv yilidan boshlab ilk bor yo‘lga qo‘yildi.Farmon ijrosi doirasida O‘zbekiston Respublikasi Vazirlar Mahkamasining 2026-yil 25-iyundagi 327-son qarori bilan tasdiqlangan “O‘zbekiston Respublikasi Odil sudlov akademiyasi magistraturasiga o‘qishga qabul qilish tartibi to‘g‘risida”gi Nizom asosida “Sud faoliyati” mutaxassisligi bo‘yicha amaliy magistraturaga qabul jarayonlari tashkil etildi.Qabul jarayonida my.edu.uz elektron platformasi orqali jami 872 nafar abituriyent hujjat topshirdi. Ularning 699 nafarini tashqi, 173 nafarini esa ichki abituriyentlar tashkil etdi.Tashqi abituriyentlar bakalavriat diplomi bo‘yicha to‘plagan ballarining o‘rtacha ko‘rsatkichi ketma-ketligiga ko‘ra saralangan bo‘lsa, ichki abituriyentlar mutaxassislik fanlari hamda xorijiy tilni bilish darajasini belgilovchi milliy yoki xalqaro sertifikat mavjud bo‘lmagan hollarda chet tilidan test sinovlari orqali tanlovdan o‘tkazildi.Tanlov yakunlariga ko‘ra, kunduzgi va kechki ta’lim shakllarida tahsil olish uchun jami 61 nafar talabgor amaliy magistraturaga qabul qilindi.Yangi o‘quv yilining ochilish tadbirida Odil sudlov akademiyasi rektori magistraturaga qabul qilingan talabalarni yangi bosqich bilan tabriklab, amaliy magistratura dasturining maqsad va vazifalari, sud-huquq sohasi uchun zamonaviy bilim va amaliy ko‘nikmalarga ega yuqori malakali kadrlar tayyorlashdagi ahamiyatiga alohida to‘xtaldi.Shuningdek, Akademiya mas’ullari tomonidan o‘quv jarayonining tashkil etilishi, ta’lim dasturining o‘ziga xos jihatlari, talabalarga yaratilgan shart-sharoit va imkoniyatlar yuzasidan batafsil ma’lumot berildi.Tadbir doirasida yangi qabul qilingan talabalar uchun Akademiya bo‘ylab tanishtiruv ekskursiyasi tashkil etildi. Unda ular zamonaviy o‘quv auditoriyalari, Axborot-resurs markazi faoliyati, sud jarayonlarini amaliy tarzda o‘rganishga mo‘ljallangan sud imitatsiyasi xonasi, shuningdek, Pro Bono yuridik klinikasi faoliyati va bu yerda yaratilgan imkoniyatlar bilan yaqindan tanishdilar.Amaliy magistratura dasturi doirasida dars mashg‘ulotlarini yetuk sud-huquq sohasi vakillari, tajribali sudyalar, yetakchi huquqshunos olimlar hamda malakali mutaxassislar ishtirokida, nazariy bilimlarni amaliy ko‘nikmalar bilan uyg‘unlashtirgan holda tashkil etish ko‘zda tutilgan.Tadbir yakunida yangi qabul qilingan talabalar ishtirokida esdalik fotosurati olindi.

Bugun Odil sudlov akademiyasida rektor raisligida yangi o‘quv yili oldidan kengaytirilgan strategik uchrashuv bo‘lib o‘tdi. Uchrashuvda Akademiya faoliyatini sifat jihatidan yangi bosqichga olib chiqish, ta’lim jarayonini sud amaliyotining zamonaviy ehtiyojlariga moslashtirish, ilmiy tadqiqotlar natijadorligini oshirish, innovatsion g‘oya va loyihalarni qo‘llab-quvvatlash hamda xalqaro ilmiy maydonda Akademiyaning o‘rni va ta’sirini kuchaytirish masalalari atroflicha muhokama qilindi.2030 yilga qadar strategik maqsad — Odil sudlov akademiyasini an’anaviy ta’lim muassasasidan zamonaviy Justice Research & Innovation Hub darajasiga olib chiqish.Ya’ni, Akademiya nafaqat bilim beradigan, balki:— sud amaliyoti uchun yangi bilim va ilmiy yechimlar yaratadigan;— odil sudlov sohasidagi kelajak tendensiyalarini prognoz qiladigan;— innovatsion g‘oya va texnologiyalarni sinovdan o‘tkazib, amaliyotga joriy etadigan;— milliy va xalqaro ilmiy kun tartibini shakllantirishda faol ishtirok etadiganyangi avlod ilmiy-innovatsion markaziga aylanishi lozim.Uchrashuvda belgilangan strategik maqsadlarni amaliy natijaga aylantirish bo‘yicha tarkibiy bo‘linmalar va mas’ul xodimlarga aniq vazifalar, ustuvor yo‘nalishlar va natijadorlik mezonlari belgilab berildi.Yangi o‘quv yili — bu shunchaki yangi akademik davr emas. Bu Odil sudlov akademiyasining 2030 yilga qadar mo‘ljallangan yangi taraqqiyot bosqichining boshlanishidir.

Odil sudlov akademiyasiga Germaniyaning Myunster universitetining O‘zbekistondagi loyiha koordinatori Nigora Isroilova tashrif buyurdi. Akademiyaning Xalqaro hamkorlik bo‘limi bilan bo‘lib o‘tgan uchrashuvda ikki tomonlama hamkorlikni kengaytirish, Germaniyada malaka oshirish uchun “Winter School” dasturini tashkil etish, shuningdek, Myunster universiteti professor-o‘qituvchilarini Akademiyaning o‘quv jarayonlariga onlayn va oflayn formatlarda jalb etish masalalari muhokama qilindi.Uchrashuv yakunida hamkorlikning istiqbolli yo‘nalishlari bo‘yicha muayyan kelishuvlarga erishildi.

Bugun Odil sudlov akademiyasi rektori boshchiligidagi mas’ullar tomonidan Akademiya kafedralarining yangi o‘quv yiliga tayyorgarlik holati hamda faoliyati o‘rganildi. O‘rganish davomida rektor kafedralarda bo‘lib, professor-o‘qituvchilar va xodimlar bilan bevosita suhbatlashdi. Ularning ish faoliyati, yangi o‘quv yiliga tayyorgarligi, yaratilgan mehnat sharoitlari, mavjud moddiy-texnik imkoniyatlar, shuningdek, taklif va mulohazalari bilan yaqindan tanishildi.Muloqotlarda o‘quv jarayonini sifatli tashkil etish, fan dasturlari va o‘quv-uslubiy materiallarni takomillashtirish, ilmiy salohiyatni oshirish, zamonaviy ta’lim metodlari hamda ilg‘or tajribalarni o‘quv jarayoniga keng joriy etish masalalariga alohida e’tibor qaratildi.Rektor kafedra professor-o‘qituvchilarining erishgan yutuq va natijalarini e’tirof etib, mavjud kamchiliklarni bartaraf etish, tashabbuskorlikni kuchaytirish, ilmiy va pedagogik faoliyat samaradorligini oshirish hamda zamonaviy bilim va texnologiyalarni amaliyotga tatbiq etish bo‘yicha tegishli tavsiyalar berdi.O‘rganish yakunida kafedralarning yangi o‘quv yiliga tayyorgarligini yanada kuchaytirish, ta’lim va ilmiy faoliyat sifatini oshirish hamda professor-o‘qituvchilar uchun zarur shart-sharoitlarni takomillashtirish yuzasidan ustuvor vazifalar belgilab olindi.

Mustaqillik — xalqimizning erkin va farovon hayoti, milliy davlatchiligimiz, tinchlik-osoyishtalik va taraqqiyotimizning mustahkam poydevoridir. Bugun yurtimizda inson qadri, qonun ustuvorligi va adolat tamoyillarini ta’minlash yo‘lida amalga oshirilayotgan keng ko‘lamli islohotlar mustaqilligimiz bergan ulkan imkoniyatlarning amaliy ifodasidir.Ushbu qutlug‘ ayyomda barchangizga mustahkam sog‘liq, oilaviy baxt-saodat, xonadonlaringizga fayz-u baraka, yurtimizga tinchlik, xalqimizga farovonlik va yangi zafarlar tilaymiz.❕ Mustaqilligimiz abadiy, Vatanimiz tinch va obod bo‘lsin! O‘zbekiston Respublikasi Odil sudlov akademiyasi jamoasi

2026-yil 27-avgust kuni Toshkent shahrida sud tizimi, huquqni muhofaza qiluvchi organlar, jurnalistlar va blogerlar o‘rtasidagi hamkorlikni mustahkamlashga bag‘ishlangan “Milliy muloqot” tadbiri bo‘lib o‘tdi. Tadbirda YUNESKOning O‘zbekistonda sudyalar va prokurorlar salohiyatini oshirish dasturi doirasida amalga oshirilgan ishlar va erishilgan natijalar muhokama qilindi.Ochilish marosimida YUNESKOning O'zbekistondagi vakolatxonasi rahbari Sara Noshadi, SDC rahbarining o‘rinbosari Ursula Keller Alazawwi, Odil sudlov akademiyasi rektori Sherzod Abduqodirov so‘zga chiqib, mazkur yo‘nalishdagi hamkorlikning ahamiyatini ta’kidladilar. Xususan, Akademiya rektori Sh.Abduqodirov o'z nutqida, YUNESKO bilan hamkorlikdagi loyihalar sudyalar va huquq sohasi vakillarining so‘z erkinligi, axborotga ega bo‘lish huquqi, jurnalistlar bilan samarali muloqot hamda xalqaro standartlarni sud amaliyotida qo‘llash bo‘yicha bilim va ko‘nikmalarini rivojlantirishda muhim ahamiyat kasb etganini ta’kidladi.Qayd etilganidek, 2025–2026-yillarda O‘zbekistonning 10 ta hududida 310 nafar sudya va professor-o‘qituvchi uchun treninglar o‘tkazilib, sudyalar uchun so‘z erkinligi va axborotga ega bo‘lish masalalariga bag‘ishlangan maxsus o‘quv moduli ishlab chiqildi.Tadbirda, shuningdek, jurnalistlar xavfsizligi, sun’iy intellekt va qonun ustuvorligi masalalari yuzasidan fikr almashilib, kelgusidagi hamkorlik yo‘nalishlari belgilab olindi.

O‘zbekiston Respublikasi Sudyalar oliy kengashi tomonidan Odil sudlov akademiyasida mamlakatimiz davlat mustaqilligining 35 yilligi munosabati bilan tantanali tadbir o‘tkazildi.Unda Sudyalar oliy kengashi va Odil sudlov akademiyasi rahbariyati, sudyalar, sud apparati xodimlari, soha faxriylari hamda OAV vakillari ishtirok etdi.Tadbirni Sudyalar oliy kengashi raisi X.Yodgorov ochib, ishtirokchilarni Mustaqillik bayrami bilan muborakbod etdi. U o‘z nutqida muhtaram Prezidentimiz rahbarligida mamlakatimizda amalga oshirilayotgan keng ko‘lamli sud-huquq islohotlari, sud hokimiyati mustaqilligini mustahkamlash, inson huquq va erkinliklarini ishonchli himoya qilish borasida olib borilayotgan ezgu ishlarga alohida to‘xtaldi.O‘zbekiston Respublikasi Prezidentining 2026-yil 22-avgustdagi tegishli Farmoniga muvofiq, “Shuhrat” medali bilan taqdirlangan Sudyalar oliy kengashi sudyasi Kamolov Xusniddin Lutfidinovich hamda Odil sudlov akademiyasi matbuot kotibi Bakirova Irodaxon Botirjonovna hamkasblari tomonidan yana bir bor samimiy muborakbod etildi.Shuningdek, bir guruh sudyalar va xodimlarga “O‘zbekiston Respublikasi mustaqilligining 35 yilligi” esdalik nishoni, sud tizimi faxriylariga esa “Sud faxriysi” ko‘krak nishoni tantanali ravishda topshirildi.Tadbirda so‘zga chiqqan mukofot sohiblari bildirilgan yuksak e’tirof uchun samimiy minnatdorlik izhor etdilar. Ular, avvalo, davlatimiz rahbari tomonidan sud-huquq tizimi va uning vakillariga ko‘rsatilayotgan yuksak e’tibor va g‘amxo‘rlikni alohida ta’kidlab, shuningdek, Sudyalar oliy kengashi hamda Odil sudlov akademiyasi rahbariyatining doimiy qo‘llab-quvvatlashi, kasbiy rivojlanish va samarali faoliyat yuritish uchun yaratilayotgan shart-sharoitlarni yuksak qadrlashlarini bildirdilar.Ta’kidlanganidek, bunday yuksak e’tirof soha vakillarini kelgusida ham odil sudlovni ta’minlash, qonun ustuvorligini mustahkamlash va inson huquqlarini ishonchli himoya qilish yo‘lida yanada katta mas’uliyat va fidoyilik bilan xizmat qilishga undaydi.Shuningdek, ko‘plab huquqshunoslarning ustozi, taniqli huquqshunos olima, davlat arbobi F. Muhiddinova tavallud ayyomi munosabati bilan jamoa tomonidan tabriklanib, unga ezgu tilaklar bildirildi.