Ўзбекистон Республикаси Одил судлов академияси ҳамда Тошкент шаҳридаги Халқаро Ишбилармон Аёллар Ассоциацияси ўртасида ҳамкорлик меморандуми имзоланди. Меморандум доирасида таълим ва амалиёт интеграциясини ривожлантириш, замонавий касбий компетенцияларни шакллантириш, хотин-қизларнинг ҳуқуқий саводхонлиги ва касбий салоҳиятини ошириш, шунингдек, тадбиркор аёлларни ҳуқуқий ва касбий жиҳатдан қўллаб-қувватлашга қаратилган қўшма лойиҳаларни амалга ошириш кўзда тутилган.Ҳамкорлик амалий таълим, экспертлик фаолияти, ҳуқуқий маърифат ва хотин-қизлар тадбиркорлигини қўллаб-қувватлаш йўналишларида янги имкониятлар яратади.

Одил судлов академияси мутахассиси иштирокида Тошкент вилояти судида «Судьяларнинг психологик барқарорлигини таъминлаш» мавзусида маҳорат дарси ва семинар-тренинг ташкил этилди. Судьялик касби нафақат қонунларни мукаммал билишни, балки юқори стресс ва кучли руҳий босим остида ҳам тўғри қарор қабул қила олишни талаб этади.Семинар давомида соҳа мутахассислари ва психологлар судьяларга иш жараёнидаги эмоционал толиқишнинг олдини олиш, ҳиссиётларни бошқариш ва мураккаб вазиятларда вазминликни сақлаш бўйича фойдали тавсиялар беришди.Тренингнинг асосий мавзулари:✅Стрессни енгиш: Иш ҳажми кўплигида руҳий чарчоқдан халос бўлиш усуллари.✅Низоли вазиятлар: Суд мажлиси қатнашчилари билан мулоқотда вазминликни сақлаш.✅Диққатни жамлаш: Қарор қабул қилишда ҳиссиётларга берилмаслик ва холисликни таъминлаш.Бу каби амалий машғулотлар судьяларнинг нафақат руҳий саломатлигини асрашга, балки вилоятимизда одил судлов сифатини янада оширишга хизмат қилади.

Ўзбекистон Республикаси Одил судлов академияси Фуқаролик-ҳуқуқий фанлар кафедраси томонидан “Ворислик ҳуқуқини такомиллаштириш масалалари: хорижий тажриба” мавзусида Республика илмий-амалий конференцияси ташкил этилди. Тадбирда Академия профессор-ўқитувчилари, судьялар, ҳуқуқшунос олимлар ҳамда соҳанинг амалиётчи мутахассислари иштирок этдилар.Конференция давомида ворислик ҳуқуқининг назарий ва амалий жиҳатлари, ворислик муносабатларини ҳуқуқий тартибга солишдаги мавжуд муаммолар, суд амалиётида учраётган масалалар ҳамда уларни ҳал этишда хорижий тажрибадан фойдаланиш имкониятлари муҳокама қилинди.Шунингдек, ворисликка оид низоларни судда кўриш, васиятнома ва қонун бўйича ворислик, мажбурий улуш, вояга етмаганлар ҳамда ота-она қарамоғидан маҳрум бўлган болаларнинг ворислик ҳуқуқлари, рақамли активлар ва рақамли мероснинг ҳуқуқий мақоми каби долзарб масалалар юзасидан фикр ва мулоҳазалар билдирилди.

Ўзбекистон Республикаси Одил судлов академияси ҳамда Ўзбекистон Республикаси Нотариал палатаси ўртасида ўзаро ҳамкорлик тўғрисидаги меморандум имзоланди.Мазкур ҳужжат таълим, илм-фан ва амалиёт уйғунлигини таъминлаш, суд ва нотариат амалиёти ўртасидаги ҳамкорликни янада кучайтириш ҳамда юқори малакали юридик кадрларни тайёрлаш жараёнини такомиллаштиришга қаратилган. Ҳамкорлик доирасида:судьялар, тингловчилар ва нотариат соҳаси вакилларининг билим ва амалий кўникмаларини ошириш;долзарб масалалар бўйича қўшма илмий-таҳлилий тадқиқотлар олиб бориш;малака ошириш ва ўқув курслари, семинарлар, давра суҳбатлари ҳамда илмий-амалий тадбирларни ташкил этиш;тажрибали нотариуслар ва Нотариал палатанинг юқори малакали мутахассисларини Академиянинг ўқув жараёнларига жалб этиш;тингловчиларнинг нотариат соҳасидаги амалий кўникмаларини шакллантириш каби йўналишларда ҳамкорлик қилиш кўзда тутилмоқда. Шунингдек, суд ва нотариат фаолиятини рақамлаштириш, ахборот технологиялари ва сунъий интеллект имкониятларидан самарали фойдаланиш, хорижий тажрибани ўрганиш ҳамда илғор амалиётларни жорий этиш масалаларига алоҳида эътибор қаратилади.

Ўзбекистон Миллий ахборот агентлиги — ЎзАда Ўзбекистон Республикаси Одил судлов академияси ректори, юридик фанлар доктори Шерзод Абдуқодировнинг “Тергов ёки суд ишларини ҳал этишга аралашганлик ва судга ҳурматсизлик учун қандай жавобгарлик белгиланди?” мавзусидаги шарҳи эълон қилинди. Унда 2026 йил 11-центабрдаги Қонун асосида Жиноят кодексининг 236-моддаси ҳамда Маъмурий жавобгарлик тўғрисидаги кодекснинг 180-моддасига киритилган ўзгартиришларнинг мазмун-моҳияти ҳақида сўз юритилган.Хусусан, тергов фаолиятига ва суд ишларини ҳал этишга ноқонуний аралашиш билан боғлиқ ҳаракатларни алоҳида жиноят таркиблари сифатида ажратиш, мансабдор шахсларнинг хизмат мавқейидан фойдаланган ҳолда аралашуви учун кучайтирилган жавобгарлик белгилаш, шунингдек, судга ҳурматсизлик учун жавобгарлик доирасини суд мажлиси билан бир қаторда суд биносида содир этилган ҳурматсизлик ҳаракатларига ҳам татбиқ этиш масалалари ёритилган.Мазкур ўзгартиришлар суд ҳокимиятининг мустақиллигини янада мустаҳкамлаш, одил судловни ҳар қандай ноқонуний таъсирдан ҳимоя қилиш ҳамда суд нуфузини таъминлашга хизмат қилиши қайд этилган. Батафсил: ЎзА сайтида ўқиш

“Янги Ўзбекистон” газетасида Ўзбекистон Республикаси Одил судлов академияси Инсон ҳуқуқлари, халқаро ҳуқуқ ва ижтимоий-гуманитар фанлар кафедраси ўқитувчиси Авазбек Юлдошбековнинг “Одил судлов – 2030” стратегияси ва суд амалиётини илмий таҳлил қилиш масалаларига бағишланган мақоласи эълон қилинди. Мақолада Ўзбекистон Республикаси Президентининг 2026 йил 14 августдаги “Одил судлов – 2030”: Янги Ўзбекистонда инсон ҳуқуқларини ишончли ҳимоя қилувчи халқчил ва адолатли суд тизимини барпо этиш стратегияси тўғрисида”ги ПФ–160-сон Фармони билан белгиланган вазифалар, хусусан, ягона суд амалиётини шакллантириш, суд фаолиятининг очиқлигини ошириш ҳамда суд амалиётини илмий асосда таҳлил қилиш масалалари ёритилган.Шунингдек, мақолада Одил судлов академиясида “Суд амалиётини таҳлил қилиш илмий-тадқиқот маркази”ни ташкил этиш, суд статистикасини мунтазам таҳлил қилиш, бекор қилинган ва ўзгартирилган суд қарорлари динамикасини ўрганиш ҳамда суд-ҳуқуқ соҳасидаги қонунчиликни такомиллаштириш бўйича илмий асосланган тавсиялар ишлаб чиқиш таклиф этилган.Натижада, суд амалиётини илмий таҳлил қилиш, таълим жараёни ва амалиёт ўртасидаги узвийликни таъминлаш, ўқув дастурларини реал амалиётдаги муаммолардан келиб чиққан ҳолда шакллантириш имконияти яратилиши қайд этилган.

Ўзбекистон Республикаси Одил судлов академияси ҳамда Ўзбекистон ёшлар иттифоқи Марказий Кенгаши ўртасида имзоланган мазкур ўзаро англашув меморандуми ёшларнинг ҳуқуқий маданиятини юксалтириш ва уларнинг жамиятдаги фаол иштирокини таъминлашга қаратилганлиги билан аҳамиятлидир. Меморандум икки ташкилот ўртасидаги мулоқотни янада ривожлантириш, ёшларнинг ҳуқуқий билим ва кўникмаларини ошириш, уларнинг суд-ҳуқуқ соҳасидаги ислоҳотлар жараёнидаги иштирокини кенгайтириш ҳамда ёшлар билан ишлаш бўйича қўшма лойиҳаларни амалга оширишга хизмат қилиши кутилмоқда. Шунингдек, меморандум доирасида ёшлар учун ҳуқуқий тарғибот тадбирлари, таълим лойиҳалари, семинар ва тренинглар ташкил этиш, илғор тажрибаларни алмашиш ҳамда истиқболли ташаббусларни қўллаб-қувватлаш бўйича биргаликдаги ишларни йўлга қўйиш назарда тутилган.

Бугун Одил судлов академиясида кечки таълим шаклида таҳсил олаётган магистрантлар учун янги ўқув жараёнининг машғулотлари ташкил этилди. Дарс машғулотларидан бири Академиянинг Жиноят-ҳуқуқий фанлар кафедраси мудири Т.Обидов томонидан ўтказилди. Машғулот давомида магистрантларга “Мустақиллик дарси” доирасида Ўзбекистон Республикасида мустақиллик йилларида, хусусан, сўнгги 35 йил мобайнида суд тизимида амалга оширилган ислоҳотлар, уларнинг мазмун-моҳияти ҳамда эришилган натижалар ҳақида батафсил маълумот берилди. Шунингдек, суд-ҳуқуқ тизимини такомиллаштириш, суд ҳокимиятининг мустақиллигини таъминлаш, фуқароларнинг ҳуқуқ ва эркинликларини ишончли ҳимоя қилиш борасида амалга оширилган изчил ислоҳотларга алоҳида эътибор қаратилди. Машғулот савол-жавоб ва фикр алмашиш тарзида қизиқарли ва мазмунли ўтди. Кечки таълим шаклидаги магистратура машғулотларининг бошланиши магистрантларнинг назарий билимларини чуқурлаштириш, уларни амалиёт билан уйғунлаштириш ҳамда касбий салоҳиятини янада оширишга хизмат қилади.

Судьялик фаолияти чуқур ҳуқуқий билим билан бир қаторда таҳлилий фикрлаш, инсон табиатини англаш, вақтни тўғри бошқариш, нутқ маданияти ва доимий касбий ривожланишни талаб этади. Шу мақсадда Одил судлов академияси Ахборот-ресурс маркази судьялар учун қуйидаги китобларни тавсия этади. 📖 БАДИИЙ ВА ҲУҚУҚИЙ-ФАЛСАФИЙ АДАБИЁТЛАР 1️⃣ «Граф Монте-Кристо» — Александр Дюма Адолат, қасос, кечирим ва инсон тақдири ҳақидаги асар. Адолат билан шахсий қасос ўртасидаги нозик чегара ҳақида мушоҳада юритишга ундайди. 2️⃣ «Жиноят ва жазо» — Фёдор Достоевский Айб, виждон, жазо ва жавобгарликнинг ҳуқуқий ҳамда ахлоқий жиҳатларини чуқур ёритади. 3️⃣ «Жараён» — Франц Кафка Одил судлов, процессуал кафолатлар, шахс ҳуқуқлари ва бюрократик тизимнинг инсон тақдирига таъсири ҳақида мушоҳада қилишга ундайди. 4️⃣ «1984» — Жорж Оруэлл Давлат ҳокимияти, шахс эркинлиги, кузатув ва ахборот устидан назорат каби масалаларни кўтаради. 5️⃣ «Ўнта негр боласи» — Агата Кристи Далилларни таҳлил қилиш, турли эҳтимолларни солиштириш ва воқеалар ўртасидаги боғлиқликни аниқлашга асосланган машҳур детектив асар. 6️⃣ «Қонунлар руҳи ҳақида» — Шарл Луи Монтескьё Ҳокимиятлар бўлиниши, қонунларнинг моҳияти ва давлат бошқарувининг ҳуқуқий асосларига бағишланган фундаментал асар. Суд ҳокимиятининг давлат ва жамиятдаги ўрнини кенгроқ англаш учун муҳим манба. ⏳ КАСБИЙ РИВОЖЛАНИШГА ОИД КИТОБЛАР 7️⃣ «Вақтни бошқариш» — доктор Иброҳим Ал-Фиқҳий Вақтдан унумли фойдаланиш, устувор вазифаларни белгилаш ва кундалик фаолиятни самарали ташкил этиш усулларига бағишланган. 8️⃣ «Time Management» — Брайан Трейси Вазифаларни устуворлик асосида режалаштириш, вақт йўқотишларини камайтириш ва иш самарадорлигини ошириш йўлларини кўрсатади. 9️⃣ «Диққат: Чалғитувчи дунёда муваффақият сирлари» — Кэл Ньюпорт Диққатни жамлаш, чалғитувчи омилларни камайтириш ва мураккаб интеллектуал вазифаларни сифатли бажаришга ёрдам беради. 🔟 «Атом одатлар» — Жеймс Клир Кичик ва мунтазам одатлар орқали самарали иш тизимини шакллантириш ҳамда узоқ муддатли натижаларга эришиш тамойилларини тушунтиради. 1️⃣1️⃣ «Нотиқлик санъати» — Цицерон Устуворлик, масъулият, самарали мулоқот, етакчилик ва доимий ривожланишга оид тамойилларни ёритади. 1️⃣2️⃣ «Нотиқлик маҳорати» — Раҳимбой Жуманиёзов Фикрни аниқ, равон ва таъсирчан ифодалаш, нутқ маданияти ҳамда аудитория билан самарали мулоқот қилиш кўникмаларини ривожлантиришга хизмат қилади. Судьянинг касбий нутқи ва мулоқот маданияти учун айниқса фойдали. 1️⃣3️⃣ «Сунъий интеллект: уни қандай тушуниш лозим?» — Ричард Сасскинд Ушбу китоб тушунишга осон ва қизиқарли ёзилган бўлиб, сунъий интеллект нима эканидан хабардор бўлган ва унинг оқибатларидан ташвиш чекаётган мутахассисга ҳам, ён-атрофимизда рўй бераётган улкан ўзгаришларнинг кўламини тушуниши зарур бўлган оддий китобхонга ҳам бирдек манзур бўлади. Бу — сунъий интеллект инқилобига қизиққан ҳар бир инсон албатта ўқиши лозим бўлган китоб. Барча юқоридаги адабиётлар ўзбек тилида мавжуд. Судьянинг касбий салоҳияти фақат қонунларни билиш билан чекланмайди. Бадиий, ҳуқуқий-фалсафий ва касбий адабиётлар мутолааси таҳлилий фикрлашни ривожлантириш, инсон табиатини англаш ва касбий маҳоратни мунтазам оширишга хизмат қилади.