Одил судлов академиясида Инновацион ривожланиш агентлиги ҳузуридаги Илмий-техник ахборот маркази билан ҳамкорликда “Ахборот ресурслари билан ишлашда Scopus, Web of Science ва Springer Nature каби халқаро базаларидан фойдаланиш амалиётини ривожлантириш” мавзусида семинар-тренинг ўтказилди. Семинар-тренинг доирасида Илмий таҳририят ва ноширлик бошқармаси бош мутахассиси, “Илм-фан ва инновацион ривожланиш” халқаро илмий-техникавий журнали бош муҳаррири, фалсафа доктори (PhD) Хилола Салоева томонидан “Илмий мақолани расмийлаштиришда сунъий интеллект имкониятларидан тўғри фойдаланиш” мавзусида маъруза қилинди. Машғулот давомида илмий мақолаларни тайёрлаш ва расмийлаштиришда сунъий интеллект воситаларидан мақсадли ва масъулиятли фойдаланиш, илмий манбалар билан ишлаш, ахборотни таҳлил қилиш ҳамда тадқиқот натижаларини халқаро талаблар асосида тақдим этишга оид амалий тавсиялар берилди. Тадбир якунида иштирокчиларни қизиқтирган саволлар юзасидан фикр алмашилди ва савол-жавоблар ўтказилди.

Одил судлов академиясида Инновацион ривожланиш агентлиги ҳузуридаги Илмий-техник ахборот маркази билан ҳамкорликда ўтказилган семинар-тренингдан сўнг Ўзбекистон Республикаси Одил судлов академиясининг илмий, инновациялар ва ахборот-таҳлилий ишлар бўйича проректори Н.Салаев билан учрашув ташкил этилди. Учрашув давомида икки ташкилот ўртасидаги ҳамкорликни янада ривожлантириш, илмий ва ахборот-таҳлилий йўналишларда қўшма ташаббусларни амалга ошириш, илмий-тадқиқот фаолиятини қўллаб-қувватлаш ҳамда замонавий ахборот ресурслари ва рақамли имкониятлардан самарали фойдаланиш масалалари муҳокама қилинди. Шунингдек, келгусида мутахассислар учун амалий семинарлар, тренинглар ва бошқа қўшма лойиҳаларни мунтазам ташкил этиш, тажриба алмашиш ҳамда ўзаро манфаатли ҳамкорликни янги босқичга олиб чиқиш юзасидан фикр алмашилди. Учрашув якунида томонлар ўзаро ҳамкорликни изчил давом эттириш ва янги қўшма ташаббусларни амалга оширишга келишиб олдилар.

Ўзбекистон Республикаси Одил судлов академиясида “Суд фаолияти” мутахассислиги бўйича амалий магистратура дастурига қабул қилинган тингловчилар учун янги ўқув йилининг очилиш маросими бўлиб ўтди. Мазкур амалий магистратура дастури Ўзбекистон Республикаси Президентининг 2025 йил 21 августдаги “Одил судлов соҳасида юқори малакали кадрлар тайёрлаш тизимини тубдан такомиллаштириш чора-тадбирлари тўғрисида”ги ПФ–141-сон Фармонига мувофиқ 2026/2027-ўқув йилидан бошлаб илк бор йўлга қўйилди. Фармон ижроси доирасида Ўзбекистон Республикаси Вазирлар Маҳкамасининг 2026 йил 25 июндаги 327-сон қарори билан тасдиқланган “Ўзбекистон Республикаси Одил судлов академияси магистратурасига ўқишга қабул қилиш тартиби тўғрисида”ги Низом асосида “Суд фаолияти” мутахассислиги бўйича амалий магистратурага қабул жараёнлари ташкил этилди. Қабул жараёнида my.edu.uz электрон платформаси орқали жами 872 нафар абитуриент ҳужжат топширди. Уларнинг 699 нафарини ташқи, 173 нафарини эса ички абитуриентлар ташкил этди. Ташқи абитуриентлар бакалавриат дипломи бўйича тўплаган балларининг ўртача кўрсаткичи кетма-кетлигига кўра сараланган бўлса, ички абитуриентлар мутахассислик фанлари ҳамда хорижий тилни билиш даражасини белгиловчи миллий ёки халқаро сертификат мавжуд бўлмаган ҳолларда чет тилидан тест синовлари орқали танловдан ўтказилди. Танлов якунларига кўра, кундузги ва кечки таълим шаклларида таҳсил олиш учун жами 61 нафар талабгор амалий магистратурага қабул қилинди. Янги ўқув йилининг очилиш тадбирида Одил судлов академияси ректори магистратурага қабул қилинган талабаларни янги босқич билан табриклаб, амалий магистратура дастурининг мақсад ва вазифалари, суд-ҳуқуқ соҳаси учун замонавий билим ва амалий кўникмаларга эга юқори малакали кадрлар тайёрлашдаги аҳамиятига алоҳида тўхталди. Шунингдек, Академия масъуллари томонидан ўқув жараёнининг ташкил этилиши, таълим дастурининг ўзига хос жиҳатлари, талабаларга яратилган шарт-шароит ва имкониятлар юзасидан батафсил маълумот берилди. Тадбир доирасида янги қабул қилинган талабалар учун Академия бўйлаб таништирув экскурсияси ташкил этилди. Унда улар замонавий ўқув аудиториялари, Ахборот-ресурс маркази фаолияти, суд жараёнларини амалий тарзда ўрганишга мўлжалланган суд имитацияси хонаси, шунингдек, Pro Bono юридик клиникаси фаолияти ва бу ерда яратилган имкониятлар билан яқиндан танишдилар. Амалий магистратура дастури доирасида дарс машғулотларини етук суд-ҳуқуқ соҳаси вакиллари, тажрибали судьялар, етакчи ҳуқуқшунос олимлар ҳамда малакали мутахассислар иштирокида, назарий билимларни амалий кўникмалар билан уйғунлаштирган ҳолда ташкил этиш кўзда тутилган. Тадбир якунида янги қабул қилинган талабалар иштирокида эсдалик фотосурати олинди.

Бугун Одил судлов академиясида ректор раислигида янги ўқув йили олдидан кенгайтирилган стратегик учрашув бўлиб ўтди. Учрашувда Академия фаолиятини сифат жиҳатидан янги босқичга олиб чиқиш, таълим жараёнини суд амалиётининг замонавий эҳтиёжларига мослаштириш, илмий тадқиқотлар натижадорлигини ошириш, инновацион ғоя ва лойиҳаларни қўллаб-қувватлаш ҳамда халқаро илмий майдонда Академиянинг ўрни ва таъсирини кучайтириш масалалари атрофлича муҳокама қилинди. 2030 йилга қадар стратегик мақсад — Одил судлов академиясини анъанавий таълим муассасасидан замонавий Justice Research & Innovation Hub даражасига олиб чиқиш. Яъни, Академия нафақат билим берадиган, балки: — суд амалиёти учун янги билим ва илмий ечимлар яратадиган; — одил судлов соҳасидаги келажак тенденцияларини прогноз қиладиган; — инновацион ғоя ва технологияларни синовдан ўтказиб, амалиётга жорий этадиган; — миллий ва халқаро илмий кун тартибини шакллантиришда фаол иштирок этадиган янги авлод илмий-инновацион марказига айланиши лозим. Учрашувда белгиланган стратегик мақсадларни амалий натижага айлантириш бўйича таркибий бўлинмалар ва масъул ходимларга аниқ вазифалар, устувор йўналишлар ва натижадорлик мезонлари белгилаб берилди. Янги ўқув йили — бу шунчаки янги академик давр эмас. Бу Одил судлов академиясининг 2030 йилга қадар мўлжалланган янги тараққиёт босқичининг бошланишидир.

Одил судлов академиясига Германиянинг Мюнстер университетининг Ўзбекистондаги лойиҳа координатори Нигора Исроилова ташриф буюрди. Академиянинг Халқаро ҳамкорлик бўлими билан бўлиб ўтган учрашувда икки томонлама ҳамкорликни кенгайтириш, Германияда малака ошириш учун “Wинтер School” дастурини ташкил этиш, шунингдек, Мюнстер университети профессор-ўқитувчиларини Академиянинг ўқув жараёнларига онлайн ва офлайн форматларда жалб этиш масалалари муҳокама қилинди. Учрашув якунида ҳамкорликнинг истиқболли йўналишлари бўйича муайян келишувларга эришилди.

Бугун Одил судлов академияси ректори бошчилигидаги масъуллар томонидан Академия кафедраларининг янги ўқув йилига тайёргарлик ҳолати ҳамда фаолияти ўрганилди. Ўрганиш давомида ректор кафедраларда бўлиб, профессор-ўқитувчилар ва ходимлар билан бевосита суҳбатлашди. Уларнинг иш фаолияти, янги ўқув йилига тайёргарлиги, яратилган меҳнат шароитлари, мавжуд моддий-техник имкониятлар, шунингдек, таклиф ва мулоҳазалари билан яқиндан танишилди. Мулоқотларда ўқув жараёнини сифатли ташкил этиш, фан дастурлари ва ўқув-услубий материалларни такомиллаштириш, илмий салоҳиятни ошириш, замонавий таълим методлари ҳамда илғор тажрибаларни ўқув жараёнига кенг жорий этиш масалаларига алоҳида эътибор қаратилди. Ректор кафедра профессор-ўқитувчиларининг эришган ютуқ ва натижаларини эътироф этиб, мавжуд камчиликларни бартараф этиш, ташаббускорликни кучайтириш, илмий ва педагогик фаолият самарадорлигини ошириш ҳамда замонавий билим ва технологияларни амалиётга татбиқ этиш бўйича тегишли тавсиялар берди. Ўрганиш якунида кафедраларнинг янги ўқув йилига тайёргарлигини янада кучайтириш, таълим ва илмий фаолият сифатини ошириш ҳамда профессор-ўқитувчилар учун зарур шарт-шароитларни такомиллаштириш юзасидан устувор вазифалар белгилаб олинди.

Мустақиллик — халқимизнинг эркин ва фаровон ҳаёти, миллий давлатчилигимиз, тинчлик-осойишталик ва тараққиётимизнинг мустаҳкам пойдеворидир. Бугун юртимизда инсон қадри, қонун устуворлиги ва адолат тамойилларини таъминлаш йўлида амалга оширилаётган кенг кўламли ислоҳотлар мустақиллигимиз берган улкан имкониятларнинг амалий ифодасидир.Ушбу қутлуғ айёмда барчангизга мустаҳкам соғлиқ, оилавий бахт-саодат, хонадонларингизга файзу барака, юртимизга тинчлик, халқимизга фаровонлик ва янги зафарлар тилаймиз.❕ Мустақиллигимиз абадий, Ватанимиз тинч ва обод бўлсин! Ўзбекистон Республикаси Одил судлов академияси жамоаси

2026 йил 27 август куни Тошкент шаҳрида суд тизими, ҳуқуқни муҳофаза қилувчи органлар, журналистлар ва блогерлар ўртасидаги ҳамкорликни мустаҳкамлашга бағишланган “Миллий мулоқот” тадбири бўлиб ўтди. Тадбирда ЮНEСКОнинг Ўзбекистонда судьялар ва прокурорлар салоҳиятини ошириш дастури доирасида амалга оширилган ишлар ва эришилган натижалар муҳокама қилинди.Очилиш маросимида ЮНEСКОнинг Ўзбекистондаги ваколатхонаси раҳбари Сара Ношади, СДС раҳбарининг ўринбосари Урсула Келлер Алазавви, Одил судлов академияси ректори Шерзод Абдуқодиров сўзга чиқиб, мазкур йўналишдаги ҳамкорликнинг аҳамиятини таъкидладилар.Хусусан, Академия ректори Шерзод Абдуқодиров ўз нутқида, ЮНEСКО билан ҳамкорликдаги лойиҳалар судьялар ва ҳуқуқ соҳаси вакилларининг сўз эркинлиги, ахборотга эга бўлиш ҳуқуқи, журналистлар билан самарали мулоқот ҳамда халқаро стандартларни суд амалиётида қўллаш бўйича билим ва кўникмаларини ривожлантиришда муҳим аҳамият касб этганини таъкидлади.Қайд этилганидек, 2025–2026 йилларда Ўзбекистоннинг 10 та ҳудудида 310 нафар судья ва профессор-ўқитувчи учун тренинглар ўтказилиб, судьялар учун сўз эркинлиги ва ахборотга эга бўлиш масалаларига бағишланган махсус ўқув модули ишлаб чиқилди.Тадбирда, шунингдек, журналистлар хавфсизлиги, сунъий интеллект ва қонун устуворлиги масалалари юзасидан фикр алмашилиб, келгусидаги ҳамкорлик йўналишлари белгилаб олинди.

Ўзбекистон Республикаси Судьялар олий кенгаши томонидан Одил судлов академиясида мамлакатимиз давлат мустақиллигининг 35 йиллиги муносабати билан тантанали тадбир ўтказилди. Унда Судьялар олий кенгаши ва Одил судлов академияси раҳбарияти, судьялар, суд аппарати ходимлари, соҳа фахрийлари ҳамда ОАВ вакиллари иштирок этди. Тадбирни Судьялар олий кенгаши раиси Х. Ёдгоров очиб, иштирокчиларни Мустақиллик байрами билан муборакбод этди. У ўз нутқида муҳтарам Президентимиз раҳбарлигида мамлакатимизда амалга оширилаётган кенг кўламли суд-ҳуқуқ ислоҳотлари, суд ҳокимияти мустақиллигини мустаҳкамлаш, инсон ҳуқуқ ва эркинликларини ишончли ҳимоя қилиш борасида олиб борилаётган эзгу ишларга алоҳида тўхталди. Ўзбекистон Республикаси Президентининг 2026 йил 22 августдаги тегишли Фармонига мувофиқ, “Шуҳрат” медали билан тақдирланган Судьялар олий кенгаши судьяси Камолов Хусниддин Лутфидинович ҳамда Одил судлов академияси матбуот котиби Бакирова Иродахон Ботиржоновна ҳамкасблари томонидан яна бир бор самимий муборакбод этилди. Шунингдек, бир гуруҳ судьялар ва ходимларга “Ўзбекистон Республикаси мустақиллигининг 35 йиллиги” эсдалик нишони, суд тизими фахрийларига эса “Суд фахрийси” кўкрак нишони тантанали равишда топширилди. Тадбирда сўзга чиққан мукофот соҳиблари билдирилган юксак эътироф учун самимий миннатдорлик изҳор этдилар. Улар, аввало, давлатимиз раҳбари томонидан суд-ҳуқуқ тизими ва унинг вакилларига кўрсатилаётган юксак эътибор ва ғамхўрликни алоҳида таъкидлаб, шунингдек, Судьялар олий кенгаши ҳамда Одил судлов академияси раҳбариятининг доимий қўллаб-қувватлаши, касбий ривожланиш ва самарали фаолият юритиш учун яратилаётган шарт-шароитларни юксак қадрлашларини билдирдилар. Таъкидланганидек, бундай юксак эътироф соҳа вакилларини келгусида ҳам одил судловни таъминлаш, қонун устуворлигини мустаҳкамлаш ва инсон ҳуқуқларини ишончли ҳимоя қилиш йўлида янада катта масъулият ва фидойилик билан хизмат қилишга ундайди. Шунингдек, кўплаб ҳуқуқшуносларнинг устози, таниқли ҳуқуқшунос олима, давлат арбоби Ф. Муҳиддинова таваллуд айёми муносабати билан жамоа томонидан табрикланиб, унга эзгу тилаклар билдирилди.